Мадриднинг «Реал» клуби Чемпионлар Лигасининг 5-турида «Шериф» устидан 3:0 ҳисобида ғалаба қозониб, плей-офф босқичига чиқди. Сешанба тунида бўлиб ўтадиган «Интер»га қарши баҳс гуруҳда биринчи ўрин масаласини ҳал қилади.
Шу тариқа мадридликлар кетма-кет 19 марта Чемпионлар Лигасининг нимчорак финал босқичига йўл олди. «Реал»нинг нуфузли мусобақадаги 19 мавсумлик иштироки ҳақида қисқача:
2003/04 йилги мавсумда «Қироллик клуби» бўлажак чемпион «Порту» билан бир гуруҳдан жой олган эди. Мадридликлар Португалия жамоасидан ташқари «Марсель» ва «Партизан»ни ортда қолдириб, гуруҳда биринчи ўринни эгаллади ва плей-оффга йўл олди. Ундан сўнг «Бавария» таслим этилди, бўлажак финалчи «Монако»га эса имконият бой берилди (биринчи ўйинда 4:2 ҳисобида ғалаба қозонган бўлса ҳам).
2004/05 йилги Чемпионлар Лигаси Мадрид жамоаси учун оғир кечди: иккинчи ўринни Киевнинг «Динамо»сига бой бериши мумкин эди (6-турга қадар иккита ўйинда мағлуб бўлиб, Украина жамоасидан бир очко кўпроқ жамғарди), плей-офф босқичида эса «Ювентус»га имкониятни бой бериб, иштирокини якунлади.
2005/06 йилда эса иккита яққол фаворитлар бир гуруҳдан жой олади: «Лион» ва «Реал». Иккала жамоа ҳам 1/8 финалга йўл олди. Гуруҳнинг қолган иштирокчилари «Русенборг» ва «Олимпиакос»да имконият йўқ эди. Кейинги босқичда «Арсенал» мадридликлардан устун келиб, чорак финалга йўл олди.
Кейинги мавсумда ҳам «Реал» «Лион» билан бир гуруҳдан жой олди. Кутилганидек иккаласи ҳам плей-оффга йўл олди («Стяуа» ва Киевнинг «Динамо»си гуруҳда қолиб кетди). «Қироллик клуби» кейинги босқичда «Бавария»га мағлуб бўлиб, мусобақани тарк этди.
2007/08 йилги Чемпионлар Лигаси гуруҳ босқичидан «Реал» ва «Олимпиакос» нимчоракка йўл олди («Вердер» ва «Лацио» квартетнинг бошқа аъзолари эди). Плей-оффнинг биринчи босқичидаёқ «Рома»га иккала ўйинда ҳам бир хил: 1:2 ҳисобида имкониятни бой бериб, мусобақа билан хайрлашди.
2008/09 йилги мавсумда мадридликлар «Зенит» ва «БАТЭ»ни гуруҳда қолдириб, «Ювентус» билан бирга плей-оффга чиқди. 1/8 финалда эса «Ливерпуль»га икки ўйин натижасига кўра 0:5 ҳисобида мағлуб бўлиб, Чемпионлар Лигасисиз қолди.
2009/10 йилги мавсумда эса «Милан», «Марсель» ва «Сюрих»ни ортда қолдириб, гуруҳда биринчи ўринни эгаллади. Кетма-кет олтинчи марта плей-оффнинг дастлабки босқичидаёқ мағлуб бўлиб, мусобақани тарк этди.
2010/11 йилги мавсумда мадридликлар фақатгина қудратли «Барселона»га ярим финалда мағлуб бўлди. Унгача «Қироллик клуби» гуруҳ босқичида «Милан», «Аякс» ва «Осер»ни ортда қолдириб, плей-оффга чиққан эди. Нимчорак ва чорак финалда «Лион» ҳамда «Тоттенҳэм» таслим этилган.
ЕЧЛ—2011/12 ҳам жамоа учун муваффақиятли ўтди: гуруҳда «Лион» (яна шу жамоа), «Аякс» ва Загребнинг «Динамо»сидан устун келди. Ярим финалда Мюнхеннинг «Бавария»сига пенальтилар сериясига кўра мағлуб бўлди.
Кейинги мавсумда «Реал» Юрген Клоппнинг «Боруссия»сига тотал устунликни бой берди. Аввалига, немис жамоасига гуруҳ босқичи етакчилигини тақдим этди. Мадридликлар иккинчи ўринни эгаллаган бўлса, «Аякс» ва «Манчестер Сити» учинчи ва тўртинчи ўринларни банд этди. Ярим финалнинг дастлабки ўйинида дортмундликларга 1:4 ҳисобида имконият бой берилди. Жавоб ўйинида «Реал» 2:0 ҳисобида ғалаба қозонган бўлса-да, финалга чиқиш учун бу етарли бўлмади.
2013/14 йилги мавсумда «Реал» Карло Анчелотти бошчилигида финалга қадар етиб борди. Серхио Рамоснинг сўнгги дақиқаларда урган голи ва «Атлетико» устидан ёрқин ғалаба мадридликларга узоқ йиллик танаффусдан сўнг совринни қўлга киритишга ёрдам берди. Гуруҳ босқичида «Галатасарой», «Ювентус» ва «Копенгаген» билан тўқнаш келган «Реал» атиги 2 очко йўқотди, холос.
2014/15 йилда Мадрид жамоаси гуруҳ босқичида «Базел», «Ливерпуль» ва «Лудогорец»ни ортда қолдириб, биринчи ўринни эгаллади. Плей-оффда бир мавсум аввалги финалдаги рақиби «Атлетико» таслим этилди. Ярим финалда Аллегри қўл остидаги «Ювентус» устун келди ва «Реал» финалсиз қолди.
2015/16 йилги Чемпионлар Лигасида Зинедин Зидан «Реал»ни «шалпангқулоқ» сари етаклаб борди. Гуруҳ босқичида «ПСЖ», «Шахтёр» ва «Малмё» билан дуч келган «Қироллик клуби» фақат бир ўйинда дуранг натижа қайд этди ва 16 очко билан биринчи ўринни эгаллади. Финалда «эски қадрдон» «Атлетико» мағлуб этилди. Бу сафар жамоалар пенальтилар сериясига қадар етиб борди.
ЕЧЛ—2016/17 да эса «Қироллик клуби» иккинчи бор совриндорга айланди. Гуруҳда «Боруссия Д»дан ортда қолган мадридликлар «Легия» ва «Спортинг»дан устун келди. Ярим финалда Диего Симеоне шогирдларини мағлуб этиб, финалда «Ювентус» устидан 4:1 ҳисобида ғалаба қозонди.
2017/18 йилги мавсумда Зидан шогирдлари ўзига хос рекорд қайд этди: кетма-кет учинчи бор «шалпангқулоқ» эгасига айланди. Гуруҳ босқичида яна иккинчи бўлди, етакчиликни «Тоттенҳэм»га бой берган жамоа «Боруссия Д» ва «АПОЭЛ»ни ортда қолдирди. Плей-офф босқичида «ПСЖ», «Ювентус», «Бавария» ва финалда «Ливерпуль» таслим этилди.
Тўртинчи бор кетма-кет совринни қўлга киритишнинг имкони бўлмади. «Рома», «Виктория» ва «ЦСКА» билан бир гуруҳга тушган мадридликлар биринчи ўринни эгаллаб кейинги босқичга чиқди. 1/8 финалдаёқ «Аякс»га мағлуб бўлиб, мусобақа билан хайрлашди. Бутун дунё ўшанда Френки де Йонг, Matteйс де Лигт, Донни ван де Бек каби футболчиларни таниди.
2019/20 йилги мусобақада ҳам «Реал» омадсиз иштирок этди. Гуруҳ босқичида «ПСЖ»дан ортда қолган бўлса ҳам, «Брюгге» ва «Галатасарой»дан устун келди. Плей-оффда эса «Манчестер Сити»га иккала ўйинда ҳам 1:2 ҳисобида мағлубиятга учради.
2020/21 йилги мавсумда «Реал» ярим финалга қадар етиб борди: плей-офф босқичида «Аталанта» ва «Ливерпуль» таслим этилди, ярим финалда эса бўлажак чемпион «Челси»га мағлуб бўлди. Гуруҳда «Боруссия М», «Шахтёр» ва «Интер» доғда қолдирилганди.
Жорий мавсумда «Реал Мадрид» кетма-кет 19 марта плей-офф босқичи йўлланмасини қўлга киритди. «Шериф» ва «Шахтёр» ортда қолдирилди, биринчи ўрин учун эса 6-турда «Интер» билан кураш олиб боради.
2024/25 йилги мавсумдан бошлаб Чемпионлар Лигаси регламенти ўзгариши ҳисобга олинса, «Реал» узоқ йиллар бу натижасини янгилаб бориши мумкин.
Изоҳ (0)