Нилуфар Усмоновани аввалига шунчаки Юлдуз Усмонованинг қизи сифатида билишган бўлса, ҳозирги кунда уни ҳам ижодкор сифатида танишади. Ўз вақтида унинг хонандалик фаолияти кўплаб танқидларга учраганди. Аммо йиллар давомида хонанда онасининг соясидаги ижодкор эмаслигини исботлай олди. 6 апрель санасида 36 ёшни қаршилаган ижодкорнинг ижод йўлига назар ташлаймиз.
Юлдуз Усмонованинг илк турмуш ўртоғи созанда Иброҳим Ҳакимов бўлган. Икки ижодкор қисқа турмуши давомида қиз фарзандли бўлишган. Аммо маълум сабабларга кўра, улар 1996 йили расман ажрашган. Нилуфар Усмонова ўз интервьюларида тўлиқ оилада улғайишни орзу қилгани ва болалагида ота-она меҳрига зор бўлгани ҳақида айтиб ўтган.
— Болалигим Марғилонда бувимнинг ҳовлисида ўтган. Раъно холам онамдек меҳр берган бўлса-да, бола барибир ўз ота-онасини соғинар экан. Холаларимнинг ўз фарзандлари бор эди. Улар билан бирга ўйнардик, уришиб қолсак барибир ўз сингли укаси билан бирга бўлиб оларди. Мен эса ёлғизланиб қолардим. Ўшанда “Ҳали болаларим кўп бўлади, ҳеч ким уларни ёлғизлатиб қўймайди”, деганимда фаришталар омин деган экан. Отамни ҳам, онамни ҳам яхши кўраман. Ажрашиш уларнинг қарори. Қарорларини ҳурмат қилган ҳолда иккисига ҳам бўлган фарзандлик меҳрим сақланиб қолади, — дейди Нилуфар Усмонова.
Нилуфар Усмонова болаликдан санъатга қизиққан. У илк марта 8 ёшида “Шайтонга бўйсунган юраклар” номли қўшиқни онаси билан дуэт тарзида ижро этган. Қўшиқ Юлдуз Усмонованинг 1995 йилдаги концерт дастури учун махсус яратилган, кейинроқ унга клип ҳам суратга олинган.
Хонанда бошланғич таълимни Марғилон шаҳридаги 18-сонли мактабда олади. Ундан сўнг онаси Нилуфарни Тошкентга олиб келиб, тил ўрганишига шароит яратади. 10 ёшида уни Буюк Британияга ўқишга юборишади, шу тарзда Нилуфар Vinehall мактаби ва Sherborn халқаро коллежида таҳсил олади. Нилуфар Усмонова 2001 йили Ўзбекистонга қайтиб келади ва ўрта таълимни халқаро мактабда якунлайди.
Хонанда Нилуфар Усмонова эрта турмушга чиққан. У 17 баҳорида ёш ҳуқуқшунос Новзод Саидгазиев билан оила қурган. 2004 йилда хонанда илк бор оналик бахтига сазовор бўлган. Хонанданинг илк турмуши узоққа чўзилмади.
— Ажрашишимизнинг сабаблари кўп. Мен бир марта расман никоҳдан ўтганман ва ажрашганман. У инсон оламдан ўтиб кетди, ёмон гаплар билан эслашни истамайман. У беш қиз ичида ўсган ягона ўғил фарзанд эди. Оиламни мустаҳкамлаш учун ҳаракат қилганман, аммо онамнинг гаплари қаттиқ таъсир қилган. “Сени истамаган инсонга интилиб қадрингни тушурма, ҳаммаси тақдирдан”, деган. Қайнонам ҳам худди онамдек чўрткесар аёл эди. Ўғлига “Ёқмаяптими ажраш”, деган. Шундай бўлса-да, бу инсондан миннатдорман. Чунки бу турмуш ақлли ўғлим Саидазамхоннинг туғилишига сабаб бўлди, — дейди хонанда Нилуфар Усмонова.
Турмушдан ажрашган Нилуфар Усмонова руҳий тушкунликка тушади. Онаси билан жиддий келишмовчиликларга бориб, ўғли билан алоҳида яшашга қарор қилади.
— Биринчи турмушим бўлмаганидан кейин онам иккинчи марта турмушга бермоқчи бўлганида ўғлимни олиб, уйдан чиқиб кетганман. Чунки мен онам айтган инсонга турмушга чиқишни хоҳламаганман, сабаби мен бошқа инсонни севардим. Онам машинамни олиб қўйиб, яшашим учун уй берган. Ўша уйнинг шароити яхши бўлгани учун мен уни ижарага бериб, ўзим шароитсиз уйда яшаганман. Чунки боламнинг боғчасига, ўзимнинг юриш-туришимга пул керак эди. Баъзан жуда пул зарур бўлиб қолганида, косметика сотадиган аёлдан товар олиб, хонанда дугоналаримга сотиб, пул топганман.
Ўғлим Саидаъзамхон куни билан боғчада бўларди, кечки пайт уйга келганида Maggi тез тайёр лапшани яхши кўргани учун, шуни олиб тайёрлаб берардим. Бола шуни еб ухларди, эрталаб яна боғчага кетарди. Уйим шу даражада эски, шароитсиз эдики, полдан линолеум йиртилиб, цементи чиқиб ётарди. Эски ‘Бирюса’ музлаткичи турарди. Уни ичида ҳеч нарса бўлмасди, деярли. Фақат овқат қилиш учун зарур бўлган гўшт, картошка, сабзи пиёз бўларди. Бир куни Саидаъзамхон ўша музлаткични очганди, уни ток уриб, орқага отиб юборди. Шу ҳолат менга жуда қаттиқ таъсир қилди. Дўстлар, таниш билишлар орқали тўйларга чиқа бошладим. Тўйларга кириб, қистирилган пулни олиб, чиқиб кетардим. Шундай қилиб, мен ўзимни тўйларда ‘раскрутка’ қилиб олганман. Менинг қўшиқларим тўйбоп бўлмагани учун ким неча пул берса бораверганман ўша тўйга.
Биринчи гонораримга олган энг қиммат нарса бу 1375 долларлик музлатгич бўлган. ‘Чиринди’ уйимда ўша қимматбаҳо музлатгич турарди. Боламни ток уриб юборгани менга қаттиқ таъсир қилган, шунинг учун музлатгичнинг энг қимматидан олганман”, — дейди хонанда.
Руҳий тушкунлик ва моддий қийинчиликлар уни ижод қилишга ундайди. 2005 йили “Болам шу юрт сеники” номли қўшиқни ижро этади. Бу билан онасига ҳам ниманидир исботлашни истаганди. Аммо қўшиқ яратиш, ижодни бошлаш осон эмас. Шу боис у продюсерлик компаниясига мурожаат қилиб, ҳамкорликни таклиф қилади.
— Биринчи марта тўйга чиқишим жуда қизиқ кечган. Дўстим Жамшид Бобожонов “Шунақа қилиб ўтираверасанми боланг учун ҳам ишлашинг керак-ку”, деб койиб берган. Шундан кейин тўйларга чиқишни бошлаганмиз. Аммо фақат дўстларимизнинг тўйига борардик. Чунки ҳали ташқаридан тўй оладиган даражада машҳур эмасдим, — дейди хонанда Нилуфар Усмонова.
Нилуфар Усмонова 2006 йили Тошкент давлат юридик институтига ўқишга киради. Аммо у ерда ўқиш осон кечмайди. 2009 йили оила қургач, академик таътил олишга мажбур бўлади. Чунки хонанда кетма-кет икки ўғил фарзандли бўлади. Хуллас, академик таътиллар бир-бирига уланиб хонанда 2013 йилда ўқишни якунлайди.
Ҳозирги кунда Нилуфар Усмонованинг беш нафар фарзанди бор. Хонанда интервьюларида яна фарзанд кўриш нияти борлигини айтиб келади.
— Еттита болам бўлишини орзу қиламан. Улар бир-бирига тиргак бўлади, — дейди у.
Нилуфар Усмонова ҳам кўпчилик ҳамкасблари сингари ўзини актрисалик борасида синаб кўрган. У илк марта “Муҳаббат синовлари” фильмида суратга тушган. Аммо ўзини актриса сифатида кашф этолмагач, бор эътиборини қўшиқчиликка қаратган.
Хонанда Отабек Муталхўжаев, Акбар Атамуҳаммедов, Шоҳруххон, Шаҳриёр ва “Божалар” гуруҳи билан дуэтлар ижро этган.
Афсуски, болалигидан тўкис оилани орзу қилган Нилуфар Усмоновага бу насиб этмади. У “Дарё”га берган интервьюсида ёлғиз эканини айтиб ўтди.
— Беш фарзандимни ёлғиз тарбиялаяпман. Ёлғиз аёлларга қанчалик қийинлигини яхши биламан. Беш боланинг таъминоти учун ҳам ҳамиша ҳаракатдаман, — деди хонанда.
Нилуфар Усмонова мунтазам спорт билан шуғулланади. Унга туқруқдан сўнг осилган қоринни йўқотиш ва ортиқча вазндан холос бўлиш ҳам муаммо эмас.
— Кўпчилик аёллар туғруқдан сўнг семиради. Менда ҳам ҳар бир фарзандимни дунёга келтиргач, вазн тўплаш билан боғлиқ муаммолар бўлган. Парҳез қилишим қийин. Шу боис кўпроқ сув, мева-сабзавотларни истеъмол қилиб, тинимсиз спорт билан шуғулланаман. Чунки парҳезда ёғлар эриши пассив, жисмоний машқлар билан шуғулланганда эса фаол бўлади. Шу боис фақат парҳезнинг ўзи билан кутилган натижага эришиш қийин, — дейди хонанда.
Нилуфар Усмонова бу йил тўнғич ўғли Саидазамхонни хорижга ўқишга жўнатди. Хонанда барча фарзандларини ингиз ва рус тилига ихтисослаштирилган мактабларда ўқитади.
Хонанда 2022 йили илк марта яккахон концерт дастурини ўтказди. У 15 йиллик фаолияти давомида бирор марта яккахон концерт дастурини тақдим этмаганди.
— Концерт беришимга ҳеч қачон тақиқ бўлмаган. Тан оламан, у пайтлари ёш бўлганман, ўйин-кулгига ўч бўлганман. Бундан ташқари, фарзандларимнинг кетма-кет туғилиши сабаб концерт беришга ўзимда куч тополмаганман. Ижодкор концерт бериш учун руҳан тайёр бўлиши керак. Шу йил концерт бериш насиб қилган экан, — дейди хонанда Нилуфар Усмонова.
Нилуфар Усмонова тадбиркорликда ҳам ўзини синаб кўришга қарор қилди. Ҳозирча унинг тур фирмаси ва рўзғор буюмлари савдоси билан шуғулланадиган дўкони бор.
Изоҳ (0)