«Истиқлол» санъат саройининг директори Исроил Ғуломов журналист Феруз Муҳаммадга интервью берди. Исроил Ғуломов суҳбат давомида саройнинг ижара ҳақи, хонандаларга концерт кунларини олиш тартиби ҳақида гапирди.
—Бир йил мобайнида «Истиқлол» санъат саройида нечта концерт дастури бўлиб ўтади ва санъат саройи нечта томошабинга мўлжалланган?
—Бир йилда 200 дан ортиқ концерт дастури бўлиб ўтади. 3932 нафар томошабинга мўлжалланган.
—«Истиқлол» санъат саройининг кунлик ижара ҳақи неча сўмни ташкил қилади?
—12 миллион 500 минг сўмни ташкил қилади.
—Биздаги маълумотларга қараганда ижара ҳақидан ташқари яна қўшимча тўловлар ҳам бўлар экан. Масалан, концерт ташкилотчиларидан чироқ, овоз техникаси учун тўловлар ундирилар экан, бундан ташқари саҳна декорациялари учун тўловлар қилинади, агар шу кабиларга тўловлар ундирилаётган бўлса, 12 миллион 500 минг сўм пул нима учун олинади ?
—12 миллион 500 минг сўм коммунал тўловлар учун олинадиган тўлов ҳисобланади. Залга қўйиладиган чироқ ҳамда овоз учун алоҳида пул тўланади. Саҳнада қандай декорация ўрнатиш ўрнатмаслиги бу концерт ташкилотчиларининг хоҳиши, биз унга жавоб бермаймиз. Лекин улар фойдаланаётган буюмлар стандарт талабларига жавоб берадиган бўлиши керак.
—Қандай стандарт талабларга жавоб бериши керак?
—Мисол учун ёнғин хавфсизлиги қоидалари, ички ишлар ходимларининг талабига жавоб бериши керак. Бундан ташқари чироқ учун олиб келадиган электр симлари ҳам бизнинг жиҳозларнинг қаршиликларига тўғри келиши керак.
—12 миллион 500 минг сўм пул «Истиқлол» санъат саройининг бир кунлик ижара ҳақини ёки шу тўлов билан 10 кун концерт берса ҳам бўладими?
—12 миллион 500 миллион сўм бир кунлик ижара ҳақи ҳисобланади, концерт эгаси хоҳласа бир кунда икки марта, уч марта концерт берса ҳам худди шу суммани тўлайди.
—Демак Озодбек Назарбеков йигирма кунлаб, Юлдуз Усмонова 15 кун мобайнида концерт берганида, ҳар кунига 12 миллион 500 минг сўмдан ижара ҳақи тўлаган эканда, шундайми?
—Албатта, ҳаммаси бир хил тўловни амалга оширади, қонун, тартиб ҳаммага бир хил.
—Концерт кунларини хонандаларга ёки ташкилотчиларга тақдим қилиш қандай амалга оширилади, хонанданинг обрў-эътиборига, рейтингига қараладими. Яқинда Озодбек Назарбеков интервьюларидан бирида «Юлдуз Усмоновага ўзимнинг концерт кунларимда концерт беришларини таклиф қилдим», деганди. Демак, рейтингги баланд хонандаларнинг ўзи ҳам ўзаро бу масалани ҳал қилишар эканда, деган фикр туғилиб қолди?
—Озодбек Назарбеков бир йил олдин концерт бериш ҳақида хат билан мурожаат қилган эди. Концертига 3 ойларча қолганида концерт бермасликка қарор қилди ва унинг номига банд қилинган кунлар Юлдуз Усмоновага ўтди.
—Одатда концерт дастурини тақдим қилмоқчи бўлган хонандалар санъат саройига қанча вақт олдин мурожаат қилишлари керак?
—3 ой олдин. Қанча олдин ҳаракатни бошлашса шунча яхши. Концерт дастурига 2 ой қолганида хонанда концерт бера олмайдиган бўлиб қолса, унинг кунларига бошқа одам концерт беришга улгуришини ҳам ўйлаб ҳаракат қиламиз. Шу сабабли хонандалардан ҳужжатларини олдинроқ олиб келишларини сўраймиз. Хонанда қанча вақт олдин ҳаракатни бошласа, шунча кўпроқ концертга тайёргарлик кўриши мумкин.
—Хонанданинг бетоблиги, ташкилотчилар билан боғлиқ муаммолар ёки бошқа сабабларга кўра қолдирилган концертлар кўп бўлганми?
—Қолдирилган бўлса бир йил ичида 2—3 та концерт дастурлари қолдирилди, улар ҳам таниқли хонандалар эмас эди.
—Мисол учун Юлдуз Усмонова, Зулайхо Бойхонова, Шаҳзода, Дилдора Ниёзова каби хонандаларнинг концерт ташкилотчилари бир хил вақтда, дейлик 8 март куни, бирваракайига концерт тақдим қилиш учун ҳужжатларини олиб келишди. Уларнинг қай бирлари ўша кунда концертларини тақдим қилишади ?
—Бундай ҳолатлар бўлмайди. Сизга иш режамни, концерт берилиши керак бўлган кунларни кўрсатадиган бўлсам, 2018 йилнинг 15 май кунигача концерт ташкилотчилари томонидан барча кунлар банд қилиб бўлинган. Бир йил, бир ярим йил олдин концерт кунларини банд қилиб, тайёргарлик бошлашмоқда. Рейтингги пастроқ хонанда белгилаб қўйган кунларни, рейтингги баланд хонанда келганда ҳам унга бера олмаймиз.
—«Мавсум», «концерт бериш вақти» деган тушунчалар бор, яъни октябрь ойидан токи май ойининг сўнгига қадар бўлиб ўтган концертларга талабалар келиши ҳисобидан ёки бошқа бир сабабларга кўра зал тўла бўлади. Шундан келиб чиқиб, концерт кунлари беришда хонанданинг рейтинггига қараладими ?
—Мен учун ҳамма санъаткор тенг. Агар санъаткор ўзи кучли бўлса, зўр бўлса, ўзининг мухлиси бўлса қайси вақтда концерт берса ҳам унинг ишқибози концертига келади. Масалан, Юлдуз Усмонова чилланинг ўртасида концерт қилса ҳам мухлислар унинг концертига келади. Бундан ташқари Озодбек Назарбеков, Шаҳзода, Улуғбек Раҳматуллаев, Райҳон каби санъаткорлар ҳам йилнинг қайси вақтида бўлса-да мухлисларни концерт залига олиб кела олишади.
—Агар Озодбек Назарбеков 2017 йилда концерт дастурини тақдим қилганида Юлдуз Усмонова қайси пайтда концерт берган бўларди?
—Агар Озодбек Назарбеков концерт дастурини тақдим қилганида, Юлдуз Усмонованинг концерт дастури ёз фаслига ёки 2017 йилнинг сентябрь, октябрь ойларига тўғри келарди.
Изоҳ (0)