АҚШнинг Орландо халқаро аэропортидан ҳавога кўтарилишга ҳозирлик кўрган самолётда ёнғин чиқди. Учоқда 290 дан ортиқ киши бўлган. Бу ҳақда Fox35 хабар берди.
Ҳодиса 21 апрель куни Delta Air Lines компаниясига тегишли Атлантага учаётган Airbus А330 самолёти билан содир бўлган. Парвоз арафасида двигателлардан бири ёниб кетган. Ҳодиса вақтида бортда 282 нафар йўловчи, 12 нафар экипаж аъзоси ва икки нафар учувчи бўлган.
Одамлар эвакуация қилинган, бироқ уч киши енгил жароҳатлар билан шифохонага ётқизилган. АҚШ Федерал авиация маъмурияти ҳодиса юзасидан текширув ўтказмоқда. Двигательда ёнғин чиқиши сабаби ва йўловчилар қанча вақт бортда ушлаб турилгани номаълум.
Delta компаниясининг Airbus А330 самолёти юқори сиғимли парвозлар учун мўлжалланган. Одатда бир нечта фавқулодда чиқиш йўллари ва эвакуация ойналари билан жиҳозланган. Йўловчилар ёнғин вақти фавқулодда чиқиш эшигидан фақат бири ишлаганини айтмоқда.
АҚШдаги сўнгги авиаҳодисалар
19 апрель куни Иллинойс штатида самолёт қулаб тушиши оқибатида тўрт киши ҳалок бўлди. Самолёт, бир двигателли Cessna 180 ҳисобланади, барча йўловчилар Висконсин штати Меномони шаҳридан бўлган. Дастлабки маълумотларига кўра, самолёт қулаш пайтида электр узатиш линияларига тегиб кетган.
16 апрель куни АҚШда самолёт двигатели қуён сабабли ёниб кетган эди. Парвоз вақтида бортда кучли портлаш ва сезиларли даражада тебраниш кузатилган. Шундан сўнг двигателда ёнғин бошланган. Самолёт бортида 153 нафар йўловчи ва 6 нафар экипаж аъзоси бўлган. Учувчилар 75 дақиқалик парвоздан сўнг самолётни фавқулодда қўндиришга мажбур бўлган эди.
10 апрель куни Нью Йорк штатида вертолёт Гудзон дарёсига қулаб тушиши оқибатида 6 киши ҳалок бўлди. Вертолёт бортида учувчи ва испаниялик сайёҳлар оиласи бўлган: икки нафар катта ёшли ва уч нафар бола. Ҳалокат сабаблари номаълум.
Изоҳ (0)