Германия Украинага ўнлаб «Гепард» ўзиюрар зенит қуролларини етказиб беради, деди Германия мудофаа вазири Кристина Ламбрехт. Reuters хабарига кўра, улар Германиянинг Krauss-Maffei Wegmann компанияси омборларидан жўнатилади. Таъминот қачон бошланиши айтилмаган.
АҚШ Мудофаа вазири Ллойд Остин Германиянинг «50 та ‘Гепард’ қурилмасини юбориш» қарорини олқишлади. «Ушбу қурилмалар Украина учун чинакам имкониятларни тақдим этади», деди у Кристина Ламбрехт билан Германия ғарбидаги Американинг Рамштайн авиабазасидаги музокаралардан сўнг.
«Гепард» ўзиюрар зенит қуроли немис армияси зенит кучларининг устунларидан бири ҳисобланади. «Иккита 35 миллиметр калибрли пулемётдан иборат ушбу қурол жанговар бўлинмаларни паст учадиган самолётлар ва вертолётлардан ҳимоя қилиш ва ердаги нишонларни йўқ қилиш учун мўлжалланган», — дейилади бундесвер хабарида. Германияда «Гепард»лардан 2010 йилгача фойдаланилган.
Die Welt нашрининг ёзишича, Германиянинг Рҳеинметалл концерни Украинага 88 та Леопард 1А5 танкини топширишга тайёр. Компания Германия ҳукуматидан қурилмаларни етказиб бериш учун рухсат сўраган. Дастлабки 22 та танк Украинага бир неча ҳафта ичида, қолганлари эса йил охиригача юборилиши кутилмоқда.
Кил университети Хавфсизлик сиёсати институтида ташриф буюрган мутахассис Марсель Дирсуснинг айтишича, Германия қарорининг асл аҳамияти жанг майдонига «Гепард»ларнинг зарурлиги эмас, балки улар берадиган сигналда. «Европадаги энг йирик иқтисодий давлат Украинани қўллаб-қувватлашга жиддий киришмоқда, ёрдам ҳажми ошади», — деди у.
Февраль ойида Германия канцлери Олаф Шольц мамлакат Украинага қурол етказиб бермаслигини айтганди. Апрель бошида эса Рҳеинметалл концерни Украинага 50 та «Леопард 1» эски танкларини етказиб беришга қарор қилган.
Изоҳ (0)