Германия Киевга Leopard 2 танкларини беришга рози бўлмаса, Польша бошқа Европа давлатлари билан Украинани қўллаб-қувватлаш учун «кичикроқ коалиция» тузишга тайёр, деди бош вазир Матеуш Моравецкий Польша матбуот агентлигига берган интервьюсида.
Польша ҳукумати раҳбари Германиянинг Киевга қурол етказиб бериш борасидаги позициясини номақбул деб атади. «Ҳар куни бегуноҳ одамлар ўлмоқда. Россия бомбалари Украина шаҳарларини вайрон қилмоқда. Германияга кўзини очиб, немис давлатининг салоҳиятидан келиб чиққан ҳолда иш юритиши учун яна нима керак?», — деди у.
Польша бош вазирининг фикрича, Германия иттифоқчиларини баҳсга тортишни ва Киевни қўллаб-қувватловчи бошқа давлатларнинг ҳаракатларини саботаж қилишни тўхтатиши керак.
«Украина ва Европа ёки Германия билан ёки Германиясиз бу урушда ғалаба қозонади. Бу фақат Германиянинг ўзига боғлиқ: ё миссияга қўшилиб, Россия ваҳшийлигини тўхтатади ёки жим кузатади ва нотўғри тарафда бўлганлар сифатида тарихда қолади», — дея қўшимча қилди Моравецкий.
Айни пайтда 22 январь куни Парижга ташриф буюрган Германия канцлери Олаф Шольц Германия Украинани «қанча керак бўлса, шунча вақт» ҳимоя қилишини ва уни қўллаб-қувватлашини маълум қилди.
Украина узоқ вақтдан бери Ғарбдаги иттифоқчиларидан, жумладан, НАТО мамлакатларида мавжуд Leopard 2 немис танкларини сўраб келмоқда. Бир қатор Европа давлатлари, жумладан, Польша ҳам ўз танкларини Киевга жўнатишга тайёрлигини маълум қилди, бироқ бунинг учун Германиядан рухсат керак. 20 январь куни Рамштайн базасида бўлиб ўтган йиғилишда якуний қарор қабул қилиниши кутилганди, аммо бундай бўлмади.
ОАВ маълумотларига кўра, Германия ҳукумати Қўшма Штатлар Украинага Abrams танкларини етказиб бериш шарти билан Leopard 2 ни топширишга рози бўлиши мумкин. Германия ҳукумати вакиллари буни рад этди. 19 январь куни Пентагон АҚШнинг Украинага янги ҳарбий ёрдам пакетини эълон қилди. Унинг таркибига Abrams киритилмаган.
Изоҳ (0)