«Дарё» нашри 23 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Фуқароликни олган муҳожирлар урушда қатнашиш мажбурияти сабаб Россиядан чиқиб кета олмайди
Россияга ишлашга келиб, кейинчалик Россия фуқаролигини олган Марказий Осиё мамлакатлари фуқаролари Россияни тарк этиб, уйга қайтиб кета олмайди, чунки уларга нисбатан сафарбарлик тўғрисидаги қонунлар амал қилади. Бу ҳақда «Осиё давлатлари ва Украина инқирози» Telegram канали ёзмоқда.
Россия паспортига эга Қирғизистон ва Тожикистон фуқаролари «Радио Свобода»га маълум қилишича, улар Россиядан чиқиб кета олмаган — чегарада улар сафарбарлик рўйхатларига киритилгани, шу сабабли Россияда қолиши кераклигини айтишган. Уларнинг Россия фуқаролиги бўлмаган дўстлари эса мамлакатни бемалол тарк этган.
Ушбу мамлакатлар ҳукуматлари огоҳлантиришича, улар бундай вазиятда муҳожирларга ёрдам бера олмайди, чунки улар аллақачон Россия фуқаролигини олган ва ўз зиммасидаги мажбуриятларни бажариши керак.
Аввалроқ Россия Тергов қўмитаси раҳбари Александр Бастрикин Россия фуқаролигига эга муҳожирлар урушда қатнашиши кераклигини айтганди. Унинг сўзларига кўра, Россия фуқаролигини олиш орқали муҳожирлар нафақат ҳуқуқларни, балки амалдаги қонунчиликда белгиланган мажбуриятларни ҳам олади. Улардан бири Россия Қуролли кучлари талабларига мувофиқ ҳарбий хизматни ўташдир.
Россияда сафарбарлик якунланса-да, сафарбарлик тўғрисидаги фармоннинг баъзи низомлари амалда
Россия президентининг матбуот котиби Дмитрий Песков Россияда сафарбарлик якунланганини, бироқ сафарбарлик тўғрисидаги фармоннинг баъзи низомлари амал қилишда давом этаётганини маълум қилди, деб ёзади «Интерфакс».
Песковнинг сўзларига кўра, Мудофаа вазирлиги армияга чақириқ бўйича режа бажарилгани ҳақида ҳисобот берганидан кейин Россияда сафарбарлик якунланган, аммо фармоннинг ўзи амал қилишда давом этмоқда, чунки сафарбарлик «бошқа тадбирларни ҳам ўз ичига олади».
«Сафарбарлик фуқароларни ҳарбий хизматга чақиришдан ташқари, қуролли кучлар вазифаларининг бажарилишини таъминлаш учун зарур бўлган бошқа тадбирларни ҳам ўз ичига олади. Шу жиҳатдан фармон амал қилишда давом этяпти», — деди матбуот котиби.
Песков ҳужжатнинг айнан қайси низомларини назарда тутаётганига аниқлик киритмади, лекин «бу ўша ёпиқ бандга ҳам тегишли экани»ни қўшиб қўйди. Сафарбарлик тўғрисидаги фармонда битта эълон қилинмаган банд бўлиб, унда сафарбар этилувчилар сони ҳақидаги ахборот бўлиши мумкинлиги тахмин қилинади.
НАТО давлатлари Украинани қўллаб қувватлашга тайёр аммо қурол етказиб беришда позициялар турлича
Польша бош вазири Матеуш Моравецкий матбуот агентлигига берган интервьюсида:Германия Киевга Leopard 2 танкларини беришга рози бўлмаса, Польша бошқа Европа давлатлари билан Украинани қўллаб-қувватлаш учун «кичикроқ коалиция» тузишга тайёр эканини айтди.
Польша бош вазирининг фикрича, Германия иттифоқчиларини баҳсга тортишни ва Киевни қўллаб-қувватловчи бошқа давлатларнинг ҳаракатларини саботаж қилишни тўхтатиши керак. Ўз навбатида 22 январь куни Парижга ташриф буюрган Германия канцлери Олаф Шольц Германия Украинани «қанча керак бўлса, шунча вақт» ҳимоя қилишини ва уни қўллаб-қувватлашини маълум қилди.
Украина узоқ вақтдан бери Ғарбдаги иттифоқчиларидан, жумладан, НАТО мамлакатларида мавжуд Leopard 2 немис танкларини сўраб келмоқда. Бир қатор Европа давлатлари, жумладан, Польша ҳам ўз танкларини Киевга жўнатишга тайёрлигини маълум қилди, бироқ бунинг учун Германиядан рухсат керак. 20 январь куни Рамштайн базасида бўлиб ўтган йиғилишда якуний қарор қабул қилиниши кутилганди, аммо бундай бўлмади.
Ўзбекистон Афғонистонга электр энергиясини етказишни қайта тиклайди, Туркманистон эса Ўзбекистонга газ етказиб беради
Энергетика вазирлиги Ўзбекистондан Афғонистонга электр энергиясини етказиб бериш қайта тикланиши режалаштирилаётганини эълон қилди.
2023 йилнинг 14 январидан Ўзбекистонда ҳаво ҳароратининг кескин пасайиши оқибатида иссиқлик электр станцияларида ёқилғи таъминотида вужудга келган муаммолар, яъни ёқилғи танқислиги ва турли носозликлар пайдо бўлгани, шунингдек, республика истеъмолчиларини барқарор электр энергияси билан таъминлаш мақсадида Афғонистонга электр энергиясини етказиб бериш вақтинчалик тўхтатилган эди.
Ўз навбатида ҳозирги ҳолатга Энергетика вазирлиги қуйидагича тушунтириш берди: «Ўзбекистонда ишлаб чиқарилган ва ички истеъмолга мўлжалланган электр энергияси экспортга йўналтирмайди. Ҳукуматлараро келишувга мувофиқ амалга ошириладиган электр энергияси импорт амалиётининг бир қисми Афғонистонга (имзоланган шартномаларга мувофиқ) экспорт қилинади».
Эслатиб ўтамиз, 2023 йилнинг 21 январидан бошлаб Ўзбекистонга Туркманистондан газ етказиб бериш қайта тикланди.
Изоҳ (0)