Германия мудофаа вазири Кристина Ламбрехт истеъфога чиқишга қарор қилди. Бу ҳақда Bild ўз манбаларига таяниб хабар берди.
Газета суҳбатдошларига кўра, истеъфо ҳақидаги ташаббус федерал канцлер идорасидан эмас, унинг ўзидан чиққан. Ҳозир Ламбрехтнинг лавозимдан кетиш санаси ҳақидаги масала кўриб чиқилмоқда. Шунингдек, эҳтимолий давомчи борасида ички маслаҳатлашувлар олиб борилмоқда, деб ёзади нашр. Bild маълумотларига кўра, номзодлардан бири бундестагнинг Германия қуролли кучлари бўйича вакили Ева Хёгль ҳисобланади.
Бўлғуси истеъфо «мисли кўрилмаган муваффақиятсизликлар кетма-кетлиги»дан кейин юз беради, деб ёзади Bild. Чунончи, Янги йил арафасида интернетда видео пайдо бўлган, унда Ламбрехт мушакбозлик фонида Украинадаги вазиятни тилга олиб, «кўп ўзига хос таассуротлар олгани» ва қизиқарли одамлар билан кўплаб учрашувлар ўтказганини таъкидлаганди. Видео ҳукумат доираларида норозиликлар ғалаёнини келтириб чиқарди.
Бундан ташқари, у Киевнинг ўз-ўзини мудофаа қилиш кучлари учун каскалар етказиб бериш таклифи учун ҳам танқид қилинди. Bild маълумотларига кўра, Ламбрехтнинг хизмат сафари чоғида унинг ўғли бундесвер вертолётида тушган сурат ҳам можарога сабаб бўлган.
Кристина Ламбрехт 2021 йил 8 декабрдан буён Германия мудофаа вазири лавозимини эгаллаб келади. У Германия Социал-демократик партияси аъзосидир. Бунгача адлия ва истеъмолчилар ҳуқуқларини ҳимоя қилиш вазири (2019—2021 йиллар) ҳамда оила, кекса фуқаролар, аёллар ва ёшлар вазири (2021 йил) лавозимларини эгаллаган.
Россия Украинада ҳарбий операция бошлаганидан буён Ламбрехт Германия Украинага қанча керак бўлса, шунча ёрдам беришга тайёрлигини бир неча марта айтиб ўтган.
Бироқ Ламбрехт Украинага оғир ҳарбий техника — Leopard танклари ёки Marder пиёда жанговар машиналарини етказишдан бош тортиб, буни НАТОнинг бошқа ҳеч қайси мамлакати Украинага бундай синфдаги ҳарбий техникани тақдим этмаётгани билан изоҳлаганди. Шунингдек, у Германиянинг ўзида оғир қурол-яроғлар етарли миқдорда эмаслигини таъкидлаганди.
Январь ўрталарида The New York Times Вашингтон ва Берлин ўртасида Украинага танклар етказиб бериш бўйича фаол музокаралар олиб борилаётганини маълум қилганди. Нашр маълумотларига кўра, Германия канцлери Олаф Шольц иттифоқдошлари томонидан тобора кучлироқ босимга учрамоқда, улар ундан Leopard танкларини етказиш бўйича розилигини талаб қилмоқда.
Bloomberg маълумотларига қараганда, Германия ҳукумати, катта эҳтимол билан, Украинага Leopard оғир танкларини етказиб беришга рухсат беради, бу ҳақдаги қарор иттифоқдош мамлакатлар мудофаа вазирликлари вакилларининг Рамштайн авиабазасида 20 январга белгиланган учрашувигача қабул қилиниши керак.
Агентлик манбалари қайд этишича, Ламбрехт Рамштайндаги учрашувда Leopard танкларини етказиб бериш бўйича «аниқ қарор»ни эълон қилиши керак.
Изоҳ (0)