Германия мудофаа вазири Кристина Ламбрехт истеъфога чиқди
Германия мудофаа вазири Кристина Ламбрехт канцлер Олаф Шольцни ўз лавозимини тарк этмоқчилиги ҳақида хабардор қилди. Бу ҳақда DPA ва Der Spiegel нашрлари ёзмоқда.
Ламбрехт ўз аризасида таъкидлашича, сўнгги ойларда оммавий ахборот воситаларининг эътибори унинг шахсиятига қаратилаётгани армия эҳтиёжлари ва фуқаролар манфаати йўлидаги муҳокамаларга соя солган.
Кейинроқ Шольц вазирнинг истеъфосини қабул қилгани ҳақида хабар берилди.
Олдинроқ немис ОАВлари Ламбрехтнинг истеъфоси кутилаётгани ҳақида хабар берганди. Вазир ушбу лавозим учун тажрибаси етишмаслиги, Россиянинг Украинага босқини фонида Германия армияси учун харидларнинг кечикиши, шунингдек, матбуотдаги жанжаллар туфайли бир неча бор танқид қилинган.
Кристина Ламбрехтнинг истеъфоси Германия ҳукумати Украинага Леопард оғир танкларини етказиб беришга қарор қилиши кутилаётган пайтга тўғри келди. Bloomberg хабар беришича, бундай қарор шу ҳафтадаёқ қабул қилиниши мумкин, аммо бу бошқа мамлакатларнинг танкларни Киевга ўтказиши учун рухсат беришни назарда тутадими ёки етказиб бериш билан Берлиннинг ўзи шуғулланадими, ҳозирча номаълум.
11 январь куни Польша президенти Анжей Дуда Украинага Леопард танклари ротасини ваъда қилганди. Улар немис муҳандислик компанияси КМW томонидан ишлаб чиқарилади, шунинг сабабли қуролларни Киевга топшириш учун Германия ҳукуматининг розилиги талаб қилинади.
20 январь куни Американинг Рамштайн авиабазасида Ғарб давлатлари мудофаа вазирлари вакилларининг учрашуви режалаштирилган, унда Украинага ҳарбий ёрдам кўрсатиш масаласи муҳокама қилинади. Учрашув олдидан Пентагон раҳбари Ллойд Остиннинг Берлинга ташрифи кутилмоқда.
