АҚШ Мудофаа вазирлиги Конгрессни президент Жо Байденнинг Украина ва Исроилга қўшимча молиялаштиришни ажратиш борасидаги сўровини маъқуллашга чақирди. Таъкидланишича, ушбу мамлакат ёрдам кўрсатиш АҚШ миллий манфаатларини ҳимоя қилиш учун зарур. Бу ҳақда Пентагон спикерининг ўринбосари Сабрина Сингх видеобрифинг давомида маълум қилди.
Сингхнинг таъкидлашича, қўшимча бюджет учун сўров Америка миллий хавфсизлиги эҳтиёжларини таъминлайди.
“Бу мамлакат ҳарбий саноати учун инвестицияга айланиб, ташқи ёрдам кўринишида олдинроқ ажратилган Пентагон қуроллари захирасини тўлдиришга ёрдам беради”, — дейди спикер ўринбосари.
Унинг сўзларига кўра, ҳозирда идора ихтиёрида президент ваколати доирасида ажратилган 4,9 миллиард долларли пакет бор холос. Бундан ташқари, Америка Мудофаа вазирлигининг ўз захираларини тўлгириш учун 1,1 миллиард доллар қолган.
Сингхнинг қайд этишича, Украинани қўллаб-қувватлаш учун кўпроқ ёрдам талаб этилади. “Украина қарши ҳужумларни амалга ошираётганини биламиз, унга мунтазам равишда қўллаб-қувватлов керак. Шу сабабдан уларнинг эҳтиёжини қондириб боришимиз лозим”, — дейди Пентагон вакили.
Мазкур масала Украина мудофаа масалалари бўйича Контакт гуруҳининг навбатдаги мажлисида муҳокама қилинади. Пентагон Рамштайн форматидаги учрашув санаси ва режасини кейинги бир неча кун ичида эълон қилади.
Аввалроқ The New York Times газетаси Жо Байден маъмурияти Украина ва Исроилга таъсир ўтказиш бўйича уринишларида қийинчиликларга дуч келаётгани ҳақида ёзганди. Байден маъмурияти Исроил бош вазири Биньямин Нетаньяхуни Ғазони бомбардимон қилишда “гуманитар пауза” қилишга кўндирмоқчи. Оқ уй Американинг Исроилга ёрдами Нетаняху Вашингтон маслаҳатига қулоқ тутишига кафолат бўлишига умид қилган. Бироқ бу содир бўлмади.
Изоҳ (0)