Оқ уй Украина ҳукуматига Америкадан қурол етиб келгунига қадар фронтда йирик ҳужумни бошламай туришни маслаҳат берди. Бу ҳақда журналистларга Жо Байден маъмуриятидаги юқори мансабли амалдор анонимлик шарти билан маълум қилди, деб ёзади Reuters.
Мансабдорнинг сўзларига кўра, АҚШ ва Украинанинг Украина қуролли кучлари қарши ҳужуми имконияти ҳақидаги музокаралари украиналиклар дастлаб АҚШ томонидан тақдим этилган энг янги қурол-яроғдан фойдаланишни ўрганишга етарлича вақт ажратиши кераклиги нуқтаи назаридан олиб борилган.
Журналистлар суҳбатдоши таъкидлашича, шунингдек, Байден маъмурияти Киевга Abrams танкларини етказиб бермаслик қарорига қатъий содиқ қолмоқда, улар, Пентагон даъво қилишича, ўта қиммат, фойдаланиш мураккаб ва кўп ёнилғи сарфлайди.
19 январь куни Жо Байден Украинага 2,5 миллиард долларлик янги ҳарбий ёрдам пакетини маъқуллади, унга ўнлаб Bradley жанговар пиёда машиналари ва Stryker бронетранспортёрлари кирди.
Аввалроқ Украина Мудофаа вазирлиги Россия армияси томонидан янги ҳужум кутилаётганини, шу билан бирга, мартга қадар «бутун Украина бўйлаб, Қримдан Донбассгача» ўзлари қарши ҳужумга ўтишни режалаштираётганини айтганди. Ғарб разведкалари вакиллари фикрича, Украина қуролли кучлари қишда ёки «баҳорги лойгарчилик мавсумидан кейин» дарҳол ҳужумга ўтишга тайёрланмоқда.
Ҳужум учун Украина ғарблик иттифоқдошларидан танклар, биринчи ўринда Леопард 2 танкларини сўрамоқда, у кўплаб НАТО мамлакатлари арсеналларида мавжуд. Бир қатор Европа мамлакатлари Киевга ўз танкларини юборишга шайлигини билдирди, аммо бунинг учун Германия рухсат бериши керак. Бу ҳақдаги қарор 20 январь куни Рамштайн авиабазасида НАТО мудофаа вазирлари учрашувида қабул қилиниши кутилганди, бироқ томонлар узил-кесил келишувга эриша олмади.
Изоҳ (0)