2013 йилдан буён Тошкентда 1 май Фавворалар куни сифатида нишонланиб келинади. Пойтахтда шу куни 70 га яқин катта ва кичик фавворалар ишга туширилади. Улар ичида бир неча йилдан бери танг аҳволда қолаётгани ҳам бор, дея хабар беради ЎзА мухбири Анора Содиқова.
У «Матбуотчилар» кўчасидаги «Матбуот уйи» қаршисида жойлашган. Мазкур фаввора худди бугунги кунда урфдан қолаётган газеталар каби панада қолиб кетмоқда.
Бунинг сабаби билан қизиқиб, «Тошкент фаввораси» давлат унитар корхонасига мурожаат қилдик. Корхона вакилининг маълумотига кўра, ушбу қаровсиз ётган фаввора «Матбуотчилар уйи» билан бир вақтда, 1970 йилларда қурилган.
Фаввора шунчаки кўргазмага эмас, балки матбуотчилар уйини ёзда салқинлатиб туриш учун махсус қурилган. Ҳозирда замонавий совутгичлар кўпайгач, фавворанинг салқинлатиш функцияси керак бўлмай қолган.
Бундан ташқари, фаввора совутгич вазифасини ўташи учун унга «хладон 13» моддаси керак бўлади. Бу модда ишлатилиши озон қатламини емирилишига олиб келгани учун ҳозирда бундай фавворалардан воз кечилмоқда.
Бироқ, ДУК вакилининг айтишича, фавворани шунчаки, гўзаллик объэкти сифатида сақлаб қолиш ўринли бўларди. Мазкур фаввора яратилиш тарихи ва жойлашган жойи билан ҳам сақлаб қолишга лойиқдир.
Мана бир неча йилдирки, фаввора қаровсиз ҳолатда қолган ва унинг канализацион тизимлари ҳам эскириб улгурган. Уларни қайта таъмирлаш эса маблағ талаб қилади.
Маблағ талаб қилинса-да, шаҳар марказидаги бундай йирик фавворани қаровсиз ташлаб қўйиш ярамайди. Уни бузиб ташлаш учун ҳам табиийки, маблағ керак.
Шундай экан, назардан четда қолаётган фавворани сақлаб қолиш ва тиклаб реконструкция қилиш мақсадга мувофиқдир. Аммо мазкур фавворанинг эгаси топилмади.
Фаввора ҳақида маълумот берган «Тошкент фаввораси» давлат унитар корхонаси вакилининг далолат беришича, фаввора ушбу корхона балансида эмас. Фаввора тегишли бўлган ташкилотни қидириб, Тошкент шаҳар Бинолардан фойдаланиш департаментига мурожаат қилдик. Департамент ҳам ўз балансида бўлган фавворалар ичида айни шу фаввора қайд этилмаганини маълум қилди.
Қизиғи шундаки, бу ҳақда Тошкент шаҳар ҳокимлигининг тегишли бўлими ҳам хабардор эмас экан. Улар ҳатто ушбу фавворани таъмирлаш у ёқда турсин, уни қайси ташкилот балансида эканлигини ҳам айтиб беролмади.
Шундан маълум бўладики, эгасиз фаввора яқин орада таъмирланмаслиги аниқ. Фаввора ҳеч қайси ташкилотга тегишли бўлмаса-да, у айнан пойтахт ҳудудида бўлгани учун ҳам унга Тошкент шаҳар ҳокимлиги масъул эканлиги аён.
Изоҳ (0)