Давлат активларини бошқариш агентлиги Тошкент вилояти Бўстонлиқ туманидаги «Чотқол оромгоҳи» ва Тошкент шаҳар Миробод туманидаги Маъмурий бино (Матбуот уйи) давлат активлари бўйича оммавий савдо жараёнлари бошланганини эълон қилди.
Мазкур бинолар президентнинг хусусийлаштирилиши белгиланган давлат активларини оммавий савдоларга чиқариш тўғрисида эълони бўйича сотувга қўйилган. Шунингдек, Тошкент шаҳар Мирзо Улуғбек тумани, Шаҳриобод кўчаси, 53-уй манзилидаги бўш турган бино-иншоотлар ҳам сотилади.
Қайд этилишича, давлат активларини сотиш икки босқичда ўтказилади. Биринчи босқичда талабгорлар олдиндан сараланади, жумладан, савдоларда қатнашиш учун талаб қилинган ҳужжатларнинг тўлиқлиги, закалат пули келиб тушгани, давлат активларидан келгусида фойдаланиш йўналишларига қўйилган талабга нисбатан талабгор томонидан таклиф этилган бизнес концепцияси лойиҳасининг мақбул ёки мақбул эмаслиги кўриб чиқилади.
Иккинчи босқичда эса талабгорнинг тижорат таклифлари (сотиб олиш нархи ва тўловни амалга ошириш муддати), закалат пули миқдори (нарх таклифининг камида 5 фоизини ташкил этиши) ҳамда тўлов қобилияти баҳоланади.
Маълум бўлишича, савдонинг биринчи босқичида иштирок этмоқчи бўлган юридик шахслар 18 декабрь куни соат 18:00 га қадар ўзбек, рус ёки инглиз тилида (талабгорнинг ихтиёрига кўра) эълондаги ариза намунаси тўлдириб, қуйидаги ҳужжатларнинг сканер қилинган шаклини «E-auksion» электрон савдо платформаси орқали тақдим этиши керак:
- юридик шахс сифатида рўйхатдан ўтганлигини тасдиқловчи гувоҳнома ва унинг устави нусхалари;
- ҳужжатлар топширилган санага талабгор, унинг таъсисчиси ва/ёки бенефициарининг тўлиқ рўйхат;
- давлат активларидан келгусида фойдаланиш йўналишларига қўйилган талабдан келиб чиққан ҳолда ундан фойдаланишнинг бизнес концепцияси лойиҳаси;
- закалат пулининг махсус ҳисоб-рақамга ўтказилгани тўғрисидаги тўлов ҳужжати нусхаси.
- солиқ тўловчининг идентификация рақами, паспорт маълумотлари;
- давлат активларидан келгусида фойдаланиш йўналишларига қўйилган талабдан келиб чиққан ҳолда ундан фойдаланишнинг бизнес концепцияси лойиҳаси;
- закалат пулининг махсус ҳисоб-рақамга ўтказилгани тўғрисидаги тўлов ҳужжати нусхаси.
«Чотқол оромгоҳи» Бўстонлиқ тумани Юсуфхона кўчаси 284-уйда жойлашган. Умумий майдони 18 гектарни ташкил этади, бино иншоот майдони 7202 метр квадрат. Меҳмонхона ёки бошқа туризм инфратузилмаси объектини барпо этиш учун мўлжалланган.
«Матбуотчилар уйи»нинг умумий майдони 0,82 гектар бўлиб, бино-иншоот қисми 18 142 метр квадратни ташкил этади. Бу бино сотувга қўйилишининг биринчи мартаси эмас. Мазкур объект 2018 йилнинг апрель ойида ҳам сотувга қўйилган эди. Ўшанда Тошкент шаҳрига янги тайинланган Жаҳонгир Ортиқхўжаев бинонинг аукцион савдосида сотилишини тўхтатган эди.
Кейинчалик, 2019 йил ноябрида Тошкент шаҳри марказида жойлашган «Матбуотчилар уйи» биноси 18,75 миллиард сўм нарх билан иккинчи марта аукционга қўйилган. Аммо бу маълумот очиқ аукцион сайтидан олиб ташланган.
Изоҳ (0)