Тошкент шаҳри марказида жойлашган «Матбуотчилар уйи» биноси иккинчи марта аукционга қўйилди. Мазкур объект 2018 йилнинг апрель ойида ҳам сотувга қўйилган эди.
2016—2017 йилларда Тошкент шаҳар ҳокимлиги қарори билан «Ўзсаноатқурилишбанк»дан «Тошбозорсавдо» уюшмаси учун шаҳардаги бозорларни реконструкция қилиш учун маблағ олинган. Гаров таъминоти сифатида эса «Матбуотчилар уйи» кўрсатилган.
Орадан бир ярим йил вақт ўтишига қарамасдан уюшма томонидан кредит қарзлари қопланмаган. Оқибатда «Матбуотчилар уйи» Миробод тумани Мажбурий ижро бюроси томонидан аукционга қўйилган.
«Тошбозорсавдо» томонидан кредит қопланмаганлиги оқибатида шаҳар марказидаги журналистлар биноси ўз баҳосидан анча арзон миқдорда аукционга қўйилгани киноя билан «уюштирилган спектаклга» ўхшатилган эди.
ОАВдаги чиқишлардан сўнг ўша вақтда Тошкент шаҳар ҳокими вазифасини бажарувчи Жаҳонгир Ортиқхўжаев мазкур иш ҳужжатлари қайта кўриб чиқилганини маълум қилган ва «Тошбозорсавдо» банкка кредит пулларини ўз ҳисобидан тўлаши белгиланган эди. «Матбуотчилар уйи» кредит гаров таъминоти сифатида бекор қилинган. Бино эса аввалгидек Тошкент шаҳар ҳокимлиги тасарруфида қолган эди.
Иқтисодий суднинг 2019 йил 4 сентябрдаги қарорига асосан бино қайтадан савдога қўйилди. Айни пайтда e.auksion.uz сайтидаги очиқ аукционда бу бино ҳақида яна маълумот пайдо бўлган.
Матбуотчилар кўчаси 32-уйда жойлашган маъмурий бинонинг 3, 4, 5, 6, 7-қаватлари ва чордоқ қисми иқтисодий судларнинг ижро ҳужжатига асосан сотувга қўйилди.
Бино 18,75 миллиард сўм нарх билан савдога қўйилган. Аукционнинг 2019 йил 5 декабрда бўлиб ўтиши белгиланган, унда қатнашиш учун аризалар эса 3 декабрга қадар қабул қилинади.
Мазкур бинода асосан матбуот вакиллари, яъни газета ва журналлар таҳририяти жойлашган.
Изоҳ (0)