18 ноябрь — Ўзбекистон Давлат байроғи қабул қилинган кун. Шу боис Регистонда 100 та байроқ ҳилпиради, Бухородаги бутун бошли бино Ўзбекистон байроғи билан қопланди. Маълумот учун, Ўзбекистон номли давлат байроғи шу вақтгача саккиз марта ўзгарган, табиийки, ҳозиргиси — энг чиройлиси! Умуман олганда, ҳар хил байроқлар ҳақидаги билимларингизни мана бу ерда синаб кўришингиз мумкин.
«Ортиқхўжаев иши»: Тонгда Жаҳонгир Ортиқхўжаев ўзи ҳақорат ва таҳдид қилган журналистлар билан учрашгани, томонлар ўртасидаги тушунмовчиликка барҳам берилгани ҳақида хабар берилган эди. Тушлик арафасида эса АОКА Тошкент ҳокимининг ҳақорат ва таҳдидларига тўлақонли ҳуқуқий баҳо берилишига ишонч билдирди. Умуман олганда, «босди-босди».
Статистика қўмитаси ҳисобот беради: Ўзбекистонда автомобиль ишлаб чиқариш ҳажми, шунингдек, «иномарка»лар учун сарфланаётган пул миқдори ҳам ошди. Машина кўпайгани билан, улар учун маҳаллий ёнилғи масаласининг долзарблиги ошмоқда — 10 ой ичида бензин ишлаб чиқариш, нефть ва газ қазиб олиш камайган. Умуман олганда эса, чакана савдо айланмаси сўнгги 10 ой ичида 7 фоизга ўсган.
Кун даҳшатлари. Фарғоналик эркак норасмий хотини билан бирга ўз аёли ва икки боласини тириклайин каналга ташлаб юборган; ижтимоий тармоқларда бир овчаркани тириклайин ёқиб юборган Баҳодирнинг видеоси тарқалди (у ҳақда маълумот берган шахсга 2 миллион сўм ваъда қилинган); Фарғонада газ тўпланиб қолган уй портлади (бахтимизга, қурбонлар йўқ). Қурбонлар Самарқандда — қувурни таъмирлаётган икки ишчи тупроқ босиб қолиши оқибатида ҳалок бўлди.
Ўзбекистонда яна нима янгиликлар? Ўзбекистонда ҳаво кескин совиб, айрим жойларда қор ёғади. Долларнинг расмий курси 9500 сўмдан ошди. Бош прокуратура 1 ой ичида 3 беморнинг ўлими қайд этилган хусусий клиника шифокорларига нисбатан жиноят иши қўзғатди. Мамлакатда спиртли ичимликларни сотиш эркинлаштирилди. Қашқадарёда Афғонистон фуқаролари ЙТҲга учради. Тошкентдаги «Матбуотчилар уйи» яна сотувга қўйилди. Тошкентда 200 дан ортиқ кишини 7 миллиард сўмга чув туширган ака-ука судланди. Ангренда эса кредит ва лизингга машина олиб беришни ваъда қилиб, 61 кишини алдаган фирибгарлар қўлга олинди.
Жаҳонда-чи? Польшада содир бўлган ЙТҲ оқибатида Ўзбекистон фуқароси оғир жароҳат олди. Покистонда террорчилик гуруҳига аъзо бўлган ўзбекистонлик эркак 9 йилга қамалди. Туркманистон—Ўзбекистон чегарасида туркманистонлик полициячилар ва божхона ходимлари муштлашди. Трамп Ким Чен Ин билан яқин орада учрашишини маълум қилди. Британиялик ҳарбийлар Ироқ ва Афғонистонда тинч аҳоли вакилларини ўлдирган. Марокаш махсус хизмати теракт амалга оширишни режалаштирган ИШИД вакилларини ҳибсга олди. Қозоғистон ТИВ Сурия бўйича музокараларнинг декабрь бошида ўтказилишини маълум қилди. Перу чўлларидан яна улкан жумбоқли суратлар топилди. Австралияда тухум катталигида дўл ёғди.
Футбол: Ўзбекистон — Фаластин тўқнашуви олдидан. Бош мураббий Вадим Абрамов вазифа ўзгармаганини маълум қилди (фаластинликлар бош мураббийи ҳам 18 ноябрь куни 17:00 да бошланадиган ўйинда фақат ғалаба ҳақида ўйлаётганини яширмади). Етакчи ярим ҳимоячиларимиздан бири Жалолиддин Машарипов Саудияга қарши ўйиндаги мағлубиятдан сўнг мухлислар олдида уятли эканини тан олди. Айтмоқчи, баҳрайнлик ҳакамлар бошқариб борадиган ўйинда марказий ҳимоячи Егор Кримец Ўзбекистонга ёрдам бера олмайди.
Изоҳ (0)