Мажбурий ижро бюроси Тошкент вилояти Тошкент туманида жойлашган алкоголь маҳсулотлар ишлаб чиқариш заводи биносини асбоб-ускуналари билан бирга аукцион савдосига қўйди. Лот ҳақидаги маълумотлар билан «E-auksion» сайтида танишиш мумкин.
Қайд этилишича, корхона Тошкент туманининг Қорасарой қишлоғи Фаровонлик кўчаси 14-уйида жойлашган бўлиб, ер участкасининг умумий майдони қарийб 2,6 гектарни ташкил этади.
Бинонинг умумий майдони 3847 квадрат метр бўлиб, шундан 1929 квадрат метр қисми фойдали ҳисобланади. Заводда электр таъминоти ва сув бор, лекин канализация ва газ тармоқларига уланмаган.
Объектнинг бошланғич баҳоси 22 миллиард 640 миллион сўмни ташкил этади. Аукционда қатнашиш учун ариза қабул қилишнинг охирги муддати 11 январь бўлиб, аукцион савдоси 13 январь куни ўтказилади.
Вино ишлаб чиқариш заводида 76 та цистерна, Ferrero Ugo e Fabrizio S ароқ маҳсулотларини қуйиш ускунаси, Frilli SRL типидаги мевадан коньяк спирти ишлаб чиқариш бўйича хом ашёни икки усулда ҳайдовчи ускуна, цистернадан винони ҳайдовчи мослама, мевани сиқиш ва данагидан ажратиш ускунаси, паст температурада маҳсулотни совутиш цистернасидан иборат асбоб ускуналар бор бўлиб, улар ҳам корхона билан биргаликда сотилади.
Изоҳ (0)