Андижон, Наманган ва Фарғонадан Хитойга янги йўналишларда парвозлар йўлга қўйилиши мумкин

Ўзбекистон ва Хитой шаҳарлари ўртасида авиақатновларни кенгайтириш режалаштирилмоқда.

Апрель бошларида Uzbekistan Airports ва China Southern Airlines компанияси ўртасида музокаралар бўлиб ўтди. Учрашувда ҳамкорликни янада ривожлантириш масалалари, мавжуд рейслар сонини ошириш ва Ўзбекистон аэропортларига янги йўналишлар очиш имкониятлари муҳокама қилинди.

Ташувчи мавжуд йўналишлар частотасини ҳафтасига етти мартагача ошириш масаласини кўриб чиқмоқда. Ҳозирда China Southern Airlines авиакомпанияси Тошкентдан Пекинга (ҳафтасига 4 марта) ва Тошкентдан Урумчига (ҳафтасига 5 марта) парвозларни амалга ошириб келмоқда.

Шунингдек, Uzbekistan Airports компанияси Андижон, Наманган ва Фарғона аэропортларидан Хитой шаҳарларига янги йўналишларни очишни таклиф қилди.

China Southern Airlines — Гуанчжоу шаҳрида жойлашган Хитой авиакомпанияси бўлиб, маҳаллий, минтақавий ва халқаро рейсларни таклиф этиб келмоқда.

Хитойнинг SF Airlines авиакомпанияси 2 апрелдан Ланчжоу—Тошкент—Ланчжоу йўналиши бўйича юк ташишни йўлга қўйди. Дастлабки босқичда парвозлар ҳафтасига икки марта амалга оширилади, кейинчалик уларнинг сонини кўпайтириш режалаштирилмоқда.

Шу куни Уммон Султонлигининг Оman Air авиакомпаниясига Ўзбекистонга мунтазам авиақатновларни амалга ошириш учун рухсатнома берилди. Boeing-737 самолётларида Маскат—Тошкент—Маскат йўналишида мунтазам авиақатновлар амалга оширилади.