O‘zbekiston va Xitoy shaharlari o‘rtasida aviaqatnovlarni kengaytirish rejalashtirilmoqda.
Aprel boshlarida Uzbekistan Airports va China Southern Airlines kompaniyasi o‘rtasida muzokaralar bo‘lib o‘tdi. Uchrashuvda hamkorlikni yanada rivojlantirish masalalari, mavjud reyslar sonini oshirish va O‘zbekiston aeroportlariga yangi yo‘nalishlar ochish imkoniyatlari muhokama qilindi.
Tashuvchi mavjud yo‘nalishlar chastotasini haftasiga yetti martagacha oshirish masalasini ko‘rib chiqmoqda. Hozirda China Southern Airlines aviakompaniyasi Toshkentdan Pekinga (haftasiga 4 marta) va Toshkentdan Urumchiga (haftasiga 5 marta) parvozlarni amalga oshirib kelmoqda.
Shuningdek, Uzbekistan Airports kompaniyasi Andijon, Namangan va Farg‘ona aeroportlaridan Xitoy shaharlariga yangi yo‘nalishlarni ochishni taklif qildi.
China Southern Airlines — Guanchjou shahrida joylashgan Xitoy aviakompaniyasi bo‘lib, mahalliy, mintaqaviy va xalqaro reyslarni taklif etib kelmoqda.
Xitoyning SF Airlines aviakompaniyasi 2-apreldan Lanchjou—Toshkent—Lanchjou yo‘nalishi bo‘yicha yuk tashishni yo‘lga qo‘ydi. Dastlabki bosqichda parvozlar haftasiga ikki marta amalga oshiriladi, keyinchalik ularning sonini ko‘paytirish rejalashtirilmoqda.
Shu kuni Ummon Sultonligining Oman Air aviakompaniyasiga O‘zbekistonga muntazam aviaqatnovlarni amalga oshirish uchun ruxsatnoma berildi. Boeing-737 samolyotlarida Maskat—Toshkent—Maskat yo‘nalishida muntazam aviaqatnovlar amalga oshiriladi.
Izoh (0)