Мутахассислар Польшанинг Интернет ресурслари кўпинча хакерлар нишонига айланишига қарамай, ушбу мамлакатнинг киберхавфсизлик даражасини юқори баҳолади. Бу ҳақда Euronews хабар берди.
Хабарга кўра, Польша Миллий киберхавфсизлик индексида биринчи ўринни эгаллаган. Дунёнинг турли мамлакатларида ахборот технологиялари хавфсизлиги ва кибертаҳдидларнинг олдини олиш даражаси баҳоланган тадқиқот давомида мазкур давлат кўпинча DDoS ҳужумларига дучор бўлиши ҳам маълум бўлган.
DDoS ҳужумчилари компьютер тизимлари ёки тармоқ хизматларини нишонга олади.
Бизнинг таҳлилларимиздан, иттифоқчиларимиз ҳамда ҳамкорларимиздан олган маълумотларимиз шуни кўрсатадики, Польша киберҳужумларнинг бир тури — DDoS ҳужумлари бўйича дунёдаги энг кўп хакерлик ҳужумига учраган мамлакатлардан бири. Вақти-вақти билан ҳатто рўйхатда биринчи ўринда туради, — дейди Польша кибермудофаа кучлари вакили Пшемйслав Липчински.
Мустақил экспертларнинг таъкидлашича, Польша ресурсларига ҳужумларнинг аксарияти Россиядан келади ва улар Украинадаги уруш ва Польша логистикаси, шу жумладан, транспорт инфратузилмаси билан боғлиқ.
Кибермаконни ҳимоя қилиш масаласи нафақат Польша учун, балки хакерлик ҳужумлари сони тез суръатларда ўсиб бораётган бутун Европа учун ҳам долзарбдир.
IT хавфсизлиги бўйича таҳлилчи Феликс Аим Европа киберҳужумдан жуда яхши ҳимояланганлигини айтиб, аъзо давлатлар ўртасида маълумот алмашишни таъминлайдиган ҳамда киберхавфсизлик учун ягона қонунчилик базаси мавжудлигини қўшимча қилган.
Изоҳ (0)