АҚШ Давлат департаменти матбуот котиби Нед Прайснинг баёнотига кўра, Қўшма Штатлар Истанбул ҳокими Экрем Имомўғли устидан чиқарилган суд ҳукмидан ҳафсаласи пир бўлган ва бундан хавотир билдирмоқда.
«АҚШ Туркия судининг Истанбул ҳокими Экрем Имомўғли устидан чиқарган ҳукмидан қаттиқ хавотирда ва бундан ҳафсаласи пир бўлган. Унинг қораланиши инсон ҳуқуқлари, асосий эркинликлари ва қонун устуворлигига бўлган ҳурматга зид», — деди Прайс.
АҚШ Туркия ҳукуматини «ҳақорат» моддаси бўйича жиноий таъқибларни тўхтатишга ва мамлакатдаги барча фуқароларнинг ҳуқуқ ва эркинликларини ҳурмат қилишга, жумладан жамоатчилик муҳокамаси учун очиқ муҳитни таъминлашга чақиради, дея қўшимча қилди Давлат департаменти вакили.
14 декабрь куни Имомўғли Марказий сайлов комиссияси вакилларини ҳақорат қилгани учун 2 йил-у 7 ойга озодликдан маҳрум қилинди. Имомўғли 2019 йилда муниципал сайловларда ғолиб чиққанидан кейин, бундан аввалги сайловлар натижаларини бекор қилган МСК вакилларини «аҳмоқлар» деб атаганди, у биринчи сайловларда ҳам ғалаба қозонганди. Ушбу ҳолат бўйича унга нисбатан очилган иш бир неча йил давомида кўриб чиқилган.
Қамоқ муддатидан ташқари, суд Имомўғлига сиёсий фаолиятни ҳам тақиқлади. Аввалроқ у 2023 йил июнида бўлиб ўтиши кутилаётган президент сайловида амалдаги давлат раҳбари Ражаб Тоййиб Эрдўғоннинг эҳтимолий рақибларидан бири бўлиши айтилганди.
Изоҳ (0)