Туркиядаги муниципал сайловларда ҳукмрон Адолат ва тараққиёт партияси (АКP) номзодлари Истанбул, Анқара ва Измирда мағлубиятга учради. Шаҳарларда мухолифат номзодлари ва амалдаги мерлар катта фарқ билан етакчилик қилмоқда. Бу ҳақда Anadolu хабар берди.
Овоз бериш мухолифатнинг 2023 йил май ойида бўлиб ўтган президентлик сайловларида мағлуб бўлганидан кейин реваншга айланди. Анқара шаҳрининг амалдаги мери, Республика Халқ партиясидан (CHP) номзод сифатида иштирок этган Мансур Яваш ўз ўрнини сақлаб қолишга муваффақ бўлди. Сайлов бюллетенларининг 41,96 фоизини санаб чиқиш натижаларига кўра, у 58,56 фоиз, ҳукмрон партия номзоди Тургут Олтиноқ эса 33,63 фоиз овоз олган.
Овозларни санаш давом этмоқда (сайлов бюллетенларининг 90 фоиздан ортиғи кўриб чиқилган). Сўнгги 35 йил ичида биринчи марта дунёвий ривожланиш тарафдори ҳисобланган Республика Халқ партияси (CHP) мамлакатда деярли 2 фоизга етакчилик қилмоқда.
Туркия бўйлаб натижалар (мамлакат бўйлаб очилган сайлов қутилари сони 90 фоиздан ошган ҳолда) қуйидагича:
- Республика Халқ партияси — 37,4 фоиз;
- Адолат ва тараққиёт партияси — 35,73 фоиз;
- Янги фаровонлик партияси — 6,06 фоиз;
- Курд тарафдори ҳисобланган DЕМ партияси — 5,58 фоиз;
- Миллатчилик ҳаракати партияси — 4,88 фоиз;
- Яхши партия (консерваторлар) — 3,76 фоиз.
Олий Сайлов Кенгаши (YSK) маълумотларига кўра, Истанбулнинг ҳозирги мери, Камолчи Экрем Имомўғли 50 фоиздан сал кўпроқ овоз олган. Имомоғлининг бу сафар 2019 йилда ғалаба қозонишига ёрдам берган коалициядаги ҳамкорлари кўмагисиз сайловда қатнашиши унга тўсқинлик қилмади. Унга ҳукмрон Адолат ва тараққиёт партиясидан собиқ атроф-муҳит вазири Мурат Қурум қарши чиқди. У 40,9 фоиз овоз билан иккинчи ўринни эгалламоқда.
Туркияда 31 март куни маҳаллий сайловлар бўлиб ўтди, унда 34 сиёсий партия иштирок этди ва 61 миллиондан ортиқ сайловчи рўйхатга олинди. Аввалроқ мамлакат президенти Ражаб Тоййиб Эрдўғон бу сайловлар унинг сиёсий фаолиятидаги сўнггиси бўлишини маълум қилганди.
Мазкур сайлов 5 йил аввал камолчиларга бой берилган мамлакатнинг асосий шаҳарлари устидан назоратни қайта тиклашга интилаётган Ражаб Тоййиб Эрдўғон машҳурлигининг барометри сифатида кўрилди.
Мутахассисларнинг қайд этишича, Туркиянинг амалдаги президенти иттифоқчиларининг ушбу сайловларда муваффақиятли иштирок этиши кейинчалик конституциявий ўзгаришларга йўл очиши ва Эрдўғонга 2028 йилдан сўнг, амалдаги ваколат муддати тугагач, ҳокимиятни бошқаришига имкон бериши мумкин.
Ўтган йилги президентлик ва парламент сайловларида мағлуб бўлган мухолифат учун эса Истанбул, Анқара ва Измирни сақлаб қолиш муҳим ҳисобланди. Сабаби бу тарафдорларини қайтадан сафарбар қилиш ва муҳим сиёсий куч сифатида ўзини намоён этишга йўл очади.
Изоҳ (0)