Туркия Экология ва шаҳарсозлик вазири Меҳмет Озхасекининг маълум қилишича, келаси ҳафта расмийлар Истанбулни эҳтимолий зилзила учун тайёрлашни бошлайди. Сейсмологлар аввалроқ Истанбулдаги ер силкинишлари хавфи ҳақида огоҳлантирган эди.
“Биз Истанбул мери ва туманлар раҳбарлари билан Истанбулда юз бериши мумкин бўлган зилзила бўйича учрашув ўтказдик, принципиал келишувга эришдик. Биз келаси ҳафта иш бошлаймиз”, — деди Озхасеки матбуот анжуманида.
Унга кўра, Истанбулда 5 миллион 800 минг бино бор. Уларнинг 1,5 миллиони хавф остида, 600 минги юқори хавф остида. Вазир зилзилага тайёргарлик тафсилотларига аниқлик киритмади.
Туркиялик сейсмолог Нажи Герюр мутахассислар Мармар денгизи ҳудудида 7,2-7,6 магнитудали зилзила бўлишини кутаётганини айтди. Унинг сўзларига кўра, Шимолий Anadolu тектоник плитасининг шимолий тармоғида ёрилиш бўлиши мумкин. Сейсмологларнинг фикрича, Туркияда навбатдаги зилзила 2030 йилгача содир бўлиши мумкин.
Жорий йилнинг 6 февраль куни Туркиянинг жануби-шарқида иккита кучли зилзила содир бўлди. Бунинг ортидан Туркияда 46 мингдан ортиқ, Сурияда эса 8,5 мингга яқин киши ҳалок бўлди. ЖССТ ушбу ер силкинишларни сўнгги юз йил ичида Европа минтақасидаги энг даҳшатли табиий офат деб атади.
Изоҳ (0)