Туркиянинг Истанбул шаҳар мэри Экрем Имомўғли Марказий сайлов комиссияси вакилларини ҳақорат қилгани учун 2 йилу 7 ойга озодликдан маҳрум қилинди, деб хабар беради HaberTurk.
Имомўғли 2019 йилда муниципал сайловларда ғолиб чиққанидан кейин, бундан аввалги сайловлар натижаларини бекор қилган МСК вакилларини «аҳмоқлар» деб атаганди, у биринчи сайловларда ҳам ғалаба қозонганди. Ушбу ҳолат бўйича унга нисбатан очилган иш бир неча йил давомида кўриб чиқилган.
Қамоқ муддатидан ташқари, суд Имомўғлига сиёсий фаолиятни ҳам тақиқлади. Аввалроқ у 2023 йил июнида бўлиб ўтиши кутилаётган президент сайловида амалдаги давлат раҳбари Ражаб Тоййиб Эрдўғоннинг эҳтимолий рақибларидан бири бўлиши айтилганди.
Сиёсатчининг ўзи суд мажлисида қатнашмади, унга адвокатлари вакиллик қилди.
Имомўғли 52 ёшда. У 2008 йилдан буён Туркиянинг «Республика-халқ партияси» аъзоси ҳисобланади, у Эрдўғоннинг «Адолат ва тараққиёт партияси»га нисбатан мухолифат позициясига эга. 2014 йилдан 2019 йилгача у Бейликдузу (Истанбулга қарашли шаҳар) мэри бўлган.
2019 йил майида Истанбул мэри лавозимига бўлиб ўтган сайловларда Имомўғли Эрдўғоннинг маслакдоши Биноли Йилдиримни кичик фарқ билан ортда қолдирди, бироқ МСК овоз бериш жараёнидаги қонун бузилишлари туфайли натижаларни бекор қилиб, июнь ойига қайтадан сайловларни белгилади. Такрорий сайловда ҳам Имомўғли ғалаба қозонди.
Туркияда президент сайлови 2023 йил 18 июнда бўлиб ўтиши керак. Эрдўғоннинг партияси февралдаёқ амалдаги президент яна ўз номзодини қўйишини эълон қилганди. Июнда эса у давлат раҳбари лавозимига номзод сифатида расман илгари сурилди.
Изоҳ (0)