Археологлар Мисрнинг Абидос некрополида қазишмалар олиб бориш давомида номаълум фиръавннинг қабрини топди. Ушбу кашфиёт Абидос сулоласининг сирларини очиб бериши мумкин. Бу ҳақда The Collector хабар берди.
Қабр, тахминан, етти метр чуқурликда жойлашган ва унинг баландлиги, тахминан, беш метрни ташкил этади. У оҳактошли дафн хонаси ва хом ғиштдан қурилган қабрхонадан иборат.
Дафн хонасига олиб борадиган кириш йўлагининг икки томонида Исида ва Нефтьида маъбудаларига бағишланган ёзувлар қолдиқлари аниқланган. Шунингдек, бир пайтлар шоҳ номини иероглифлар билан ифодалаган сариқ ёзув тасмалари топилган. Безаклар ва матнларнинг услуби шоҳона келиб чиқишини кўрсатади.
Топилма милоддан аввалги 1700−1550 йилларга тўғри келади. Бу даврда расмий фиръавнлар билан бирга, қисқа муддат бошқа сулола ҳукмронлик қилган бўлиши мумкин, яъни сирли Абидос сулоласи.
Бир қатор мисршунослар Абидос сулоласи милоддан аввалги 1650 йилдан 1600 йилгача Юқори Мисрни Гиксос фиръавнлари билан бир вақтда бошқарган деб ҳисоблайди. Бу давр мамлакатдаги сиёсий беқарорлик ва ташқи босқинлар билан машҳур. Бироқ, тарихий далилларнинг етишмаслиги туфайли Абидос сулоласининг ҳақиқий мавжудлиги ҳақидаги баҳслар ҳали ҳам давом этмоқда.
Изоҳ (0)