Олимлар 1997 йилда Бразилиянинг Серра-да-Капивара миллий боғидаги қабристонда аниқланган аёлнинг бош суяги шакли ва ўлчамини ўрганиб, у аслида эркак эканини илгари сурди. Бу ҳақда Live Science хабар берди.
Аввалроқ олимлар бош суягининг шакли ва ўлчами ҳақидаги маълумотларга асосланиб, скелет тахминан 9600 йил аввал ҳозирги Бразилия ҳудудида яшаган аёлга тегишли эканини тахмин қилган. Шунинг учун унга Зузу деб исм қўйишган. Машҳур график рассом Сисеро Мораес кўмагида бир гуруҳ бразилиялик археологлар скелетни, хусусан, ҳозирги Бразилия ҳудудида 9600 йил аввал яшаган одамнинг бош суягини қайта текширишга қарор қилди. У сўнгги ўн йилликларда Бразилиядаги энг муҳим археологик топилмалардан бири ҳисобланади.
Археолог Моасир Элиас Сантос бошчилигида олимлар Зузу бош суягининг ўнлаб рақамли тасвирларини яратди, кейин уларни бирлаштириб, батафсил 3D моделини ишлаб чиқди. Улар Зузу аслида аёл эмас, эркак бўлганини таъкидлаб, унинг юзини қайта тиклаш билан буни исботлашга уринди.
Шунингдек, мутахассислар бош суягининг компьютер томографиясидан фойдаланди ва уни ҳозирги одамларнинг бош суяги шакли ва ўлчамига солиштирди. Бош суягининг хусусиятларига асосланиб, олимлар унинг тузилишини яратдилар. Мараеснинг сўзларига кўра, улар қадимги бразилияликнинг юзини имкон қадар тиклашга муваффақ бўлди.
Олимларнинг фикрича, Зузу кенг бурни ва лаби бўлган эркак эди. Гарчи бу одам осиёликка ўхшаса-да, Зузу ва Осиёда яшовчи одамлар ўртасида бош суяги тузилишида сезиларли фарқлар мавжудлиги айтилган.
Зузунинг юзини қайта янги тиклаш у аёл ёки эркак экани ҳақидаги баҳсларга барҳам бериши мумкин. Аммо тадқиқот мутахассислари иккинчи вариантни танламоқда.
Изоҳ (0)