Instagram платформасида турли ҳазиллар билан ижод қилаётган блогер Шерзод Мамадалиев калтакланиб кетилгани акс этган хабар ижтимоий тармоқларга тарқалди. “Дарё” мухбири блогер билан боғланиб, вазиятга ойдинлик киритди.
— Воқеа 28 октябрь куни соат 22:30 ларда содир бўлди. Савдо маркази ёнида Ички ишлар ходими билан гаплашиб тургандим. Бир йигит келиб, мушт туширди. У йигитни аввал ҳам кўрганман, гаплашганман. Аммо нима мақсадда бу ишни қилганини тушунмай қолдим. Кейин билсам спортчи йигит экан, зарбадан кейин ўзимни ўнглолмай қолдим. Беш кун Фарғонадаги касалхонада даволандим. Юз суягим синган, кўзим ҳам жиддий жароҳат олган. Текширувларга кўра, кўзларим ҳам гемотома бўлган, агар вақтида даволанмаса, кўриш даражаси жиддий пасайиши мумкин экан. Ҳозир Тошкентдаги хусусий клиникада даволаняпман, — дейди Шерзод Мамадалиев.
Фарғона вилояти ИИБ ахборот хизматининг маълум қилишича, ушбу ҳолат юзасидан Жиноят кодексининг 105-моддаси (қасддан баданга ўртача оғир шикаст етказиш) 2-қисми “и” банди билан жиноят иши қўзғатилиб, 3 нафар шахс гумонланувчи сифатида Жиноят-процессуал кодексининг 221-моддаси (ушлаб туриш асослари) тартибида ушланган.
Эслатиб ўтамиз, Шерзод Мамадалиев аслида профессионал цирк актёри ҳисобланади. У нафақат ўзбек, балки Хитой циркида ҳам фаолият юритган. Аммо охирги пайтларда у асосан ижтимоий тармоқларда қиз-аёллар овозини тақлид қилган видеоларни жойлаётган эди.
Изоҳ (0)