Си Цзиньпинни масхарабоз деб атаган хитойлик тадбиркор ва блогер коррупцияда айбланиб, 18 йилга ҳукм қилинди

Хитойлик тадбиркор ва блогер, Huayuan Real Estate Grouр давлат қурилиш компаниясининг собиқ раҳбари Жэнь Чжицян коррупцияда айбланиб, 18 йилга ҳукм қилинди. Бу ҳақда суд қарорига таяниб The New York Times хабар бермоқда.

У маблағларни ўзлаштириш, пора олиш ва қиймати камида 131 миллион юань (тахминан 19 миллион доллар)га тенг бошқа иқтисодий жиноятларда айбдор деб топилган.

Қамоқ жазосидан ташқари, судланувчига 4,4 миллион юань (620 минг доллар) миқдорида жарима белгиланган. Суд қарорида у суд ҳукми устидан шикоят қилмаслиги айтилган.

Хабарда айтилишича, Жэнь Чжицян 2020 йилнинг март ойида интернетнинг Хитой сегментида коронавирусга бўлган муносабати учун Коммунистик партия танқид қилинган, мамлакат етакчиси Си Цзиньпин эса «масхарабоз» деб аталган эссе (унинг муалифи сифатида Жэнь Чицин кўрсатилган) пайдо бўлганидан кейин йўқолиб қолган. Апрель ойида Хитой ҳукумати тадбиркор коррупция иши бўйича тергов қилинаётганини маълум қилган. Июль ойида эса у Коммунистик партиядан чиқарилган.

Жэнь Чжицян Хитойда ҳукуматни оммавий танқид қилгани билан машҳур. У 2016 йилда ОАВ партияга хизмати қилиши кераклигини айтган Си Цзиньпинни танқид қилган. Шундан сўнг ҳукумат унинг қарийб 38 миллионта обуначилари бўлган Weibo микроблоглар платформасидаги аккаунтини ёпиб юборган.