Хитойлик инвесторлар Фарғона вилоятининг Қувасой саноат зонасида “Тулпор” савдо белгиси остида тракторлар ишлаб чиқаришни йўлга қўймоқчи.
Вилоят ҳокимлиги матбуот хизматининг маълум қилишича, Хайрулло Бозоров хитойлик инвестор Юан Янпин бошчилигидаги делегация аъзоларини қабул қилди. Учрашувда Қувасой шаҳридаги саноат зонасида умумий лойиҳа қиймати 100 миллион доллар бўлган, биринчи босқичда 30 миллион доллар сарфланиши кўзда тутилган тракторлар ишлаб чиқариш лойиҳасини бошлаш масаласи муҳокама қилинди.
Хитойлик ҳамкорлар билан Фарғона трактор ишлаб чиқариш корхонаси рўйхатдан ўтказилди. 2025 йилнинг якунига қадар “Тулпор” миллий бренди асосида бир нечта русумдаги тракторлар ишлаб чиқарилади. Корхона том қисмига 2 мегаватт электр энергияси ишлаб чиқариш қувватига эга қуёш панеллари ўрнатилади ва мустақил ўзини электр билан таъминлайди.
Икки босқичли лойиҳага кўра, биринчи босқичда тракторлар ишлаб чиқарувчи завод қурилади ва кейинги босқичда бутловчи қисмлар тайёрлаш ва техник хизмат кўрсатиш йўлга қўйилади. Ишлаб чиқариш самарадорлигини ошириш ва маҳсулот сифатини яхшилаш мақсадида smart технологиялардан фойдаланилади. Тракторлар маҳаллий ва хорижий харидорларга етказиб берилади.
Дастлабки босқичда 250 та иш ўрни яратилиши кўзда тутилган.
Хитойлик инвесторлар режалаштирган лойиҳалар
2024 йилнинг июнида Хитой компанияси Фарғонада йирик автомобилсозлик мажмуасини барпо этиши хабар берилган эди. China Xiaou Group раҳбари билан ўтказилган музокараларда ушбу лойиҳанинг дастлабки босқичида 50 миллион доллар инвестиция ҳисобига йиғиш, бўяш, созлаш линияларини йўлга қўйиб, йилига 60 мингта газ, электр ва гибрид моторли автомобиллар ҳамда махсус транспорт воситалари ишлаб чиқарилиши белгиланганди.
Иккинчи босқичда 350 миллион доллар ва учинчи босқичда 1,1 миллиард доллар инвестиция йўналтирилиб, бутловчи қисмларнинг кўпи маҳаллийлаштирилиши ҳамда ишлаб чиқарилаётган автомобилларнинг сони 110 мингтага етказилиши кўзда тутилган. Лойиҳа 5 йил давомида тўла якунланиши режалаштирилган.
Хитойнинг машинасозлик соҳасида илғор компанияларидан бири бўлган Zhejiang Yizhou Machinery Technology компанияси вилоят ҳудудида қурилиш саноати учун ускуналар ишлаб чиқаришни режалаштирмоқда.
Баишан Zhongtian Development компанияси томонидан Фарғона шаҳрида беш юлдузли меҳмонхона ва савдо маркази мажмуасини барпо этиш кўзда тутилган.
Бундан ташқари, China CAMC Engineering компанияси Ўзбекистонда биринчи чиқиндиларни ёқиш заводини қурмоқчи. Хитойнинг JC Finance Interconnect Holdings компанияси эса таълим ва касбга тайёрлаш ўқув марказини очмоқчи.
Изоҳ (0)