Тошкент шаҳрининг Бектемир туманида 12 март куни тезкор тадбир ўтказилди, деб хабар берди ИИВ матбуот хизмати.
Унда 1992 йилда туғилган, риэлторлик фаолияти билан шуғулланувчи шахс қўлга олинди. У 1983 йилда туғилган фуқарога Тошкент вилояти, Бўстонлиқ туманидаги 72,6 сотих нотурар ер майдонини 1 млн долларга сотишини айтган.
Шунингдек, юқори лавозимда ишловчи танишлари орқали 1 ойда ушбу ер майдони тоифасини турар жойга ўзгартириб, кўп қаватли уй-жой қуриш учун рухсатномани ва барча ҳужжатларни расмийлаштириб бериш эвазига 100 минг доллар талаб қилган.
У аванс тариқасида 110 минг доллар олган вақтида ушланди.
Олмазор туманида ўтказилган тезкор тадбирда эса МИБнинг қарздорлик бўйича юритаётган ижро ҳужжатларини тугатиш эвазига катта миқдорда пул талаб қилган шахс қўлга олинди.
У 1972 йилда туғилган фуқаронинг 647 млн сўм миқдоридаги қарздорлик бўйича ижро ҳужжатларини тугатиш ва Ўзбекистондан чиқиш учун унга қўйилган тақиқни ечиб бериш эвазига 25 минг доллар талаб қилган.
У Олмазор тумани, Зарқайнар кўчасида 25 доллар олган вақтида ушланди.
Ҳолат бўйича Жиноят кодексининг 168-моддаси 4-қисми “а” банди (фирибгарлик жуда кўп миқдорда), 211-моддаси 3-қисми “а” банди (пора бериш жуда кўп миқдорда) билан жиноят иши қўзғатилиб, гумонланувчига нисбатан қамоқ эҳтиёт чораси қўлланилди.
Сўнгги ойларда ерни ноқонуний сотишга уриниш ҳолатлари
2025 йил февралида Фарғонада фуқаро 2,5 гектар ерни 650 минг долларга сотишга келишиб, олдиндан 100 минг долларни олган вақтида ашёвий далиллар билан ушланганди. Тошкент вилояти Оҳангарон туманида жойлашган ва қишлоқ хўжалигига мўлжалланган 32 гектар ерни 2,4 млн долларга ноқонуний сотмоқчи бўлган шахс ушланганди. Сурхондарё вилоятида қишлоқ хўжалигига мўлжалланган 45 сотих ерни 60 минг долларга сотишга келишиб, 56,7 минг доллар ва 43 миллион сўм олган вақтида қўлга тушганди. Хоразм вилоятининг Урганч туманида фуқаро давлат захирасида бўлган 24 сотих ер майдонини кадастр тизимида ишловчи танишлари орқали харидор номига расмийлаштириб бериш эвазига 45 минг доллар ва 13 миллион сўм олган вақтида ушланганди.
Изоҳ (0)