Актриса Хонзода Дўстова “Дарё”нинг YouTube каналига берган интервьюсуда болалиги, саломатлигидаги ўзгариш сабаб рақс мактабига боргани ва нима сабабдан отаси санъаткор бўла туриб, қизининг бу соҳани эгаллашига қарши бўлгани ҳақида сўзлаб берди.
— Болаликда жуда шўх, ерга урса кўкка сапчийдиган қиз бўлганман. Оилада икки фарзандмиз, акам бироз эрка эди. Ота-онам бирор марта акамнинг ортидан ортиқча гап эшитмаган. Аммо болаларни урган, тартибга чақирган ҳамиша мен бўлардим. Хонзода деса ҳамма танирди. Отам Аслиддин Дўстов ҳар доим тўй-хизматлари ва ижодий сафарлар билан банд эди. Турган гапки, ҳамма оилада бўлганидек, тарбиямиз билан онам кўпроқ шуғулланарди. Онам ҳам санъаткорлар оиласида тарбия кўрган ва болаликдан санъаткор бўлишни орзу қилган. Отам билан бир олийгоҳда ўқиётганида, оила қуришган. Аммо рашк сабаб дадам онамнинг ижод қилишини истамаган. Онам кўнглига кўмиб қўйган ижод меҳрини бизга бағишларди. Бошқа оналар фарзанди билан ўйин ўйнаса, бизнинг уйда янги қўшиқ ўрганиларди. Хуллас, мана шундай муҳит сабаб акам ва мен санъатга меҳр қўйганмиз. Онам бобом сингари катта ашулаларни айтишимни истарди, — дейди Хонзода Дўстова.
У соғлигида муаммо сабаб, рақсга боргани ва аммо 9-синфни битириш арафасида отасининг бирдан қарори ўзгариб, уни санъаткор бўлишини истамагани ҳақида сўзлаб берди.
— Ўсмирлик вақтида бўйим баландлиги ва озғинлигим сабабли, менда букри бўлиб қолиш эҳтимоли юқори эди. Шунда рақс мактабига борса, қомати чиройли ўсади, деб мени Хореография олий мактабига беришган. У ердаги муҳит ҳар тамонлама маъқул эди. Аммо мактабни тамомлаш арафасида отам санъатга бўлган меҳрим кучли эканлигини кўриб, ҳужжатларимни олиб Жаҳон тилла университети қошидаги академик лицейга олиб бориб топширган. Тил ўрганишда умуман иштиёқим йўқ эди. Ноиложликдан дарсларга бориб юрганимда, тенгдошларимдан анча ортда эканлигимни англаганман. Мен табиатан лидерликка интиладиган инсонман. Дадамга “Санъаткор бўлишимни ицамасангиз, репититоримга пул берасиз”, деб дарсдан кейин ўқув курсларига қатнаганман. Жуда қисқа муддатда инглиз тилини ўрганиб, тенгдошларим ичида биринчи бўлганман, — дейди Хонзода Дўстова.
Блогер ҳинд киноларининг шайдоси бўлгани ва Шоҳруҳ Хон билан учрашиш учун ҳам инглиз тилини мукаммал ўрганишга ҳаракат қилгани ҳақида сўзлаб берди.
— Болаликдан ҳинд киносининг шайдоси бўлганман. У пайтлари ижарага видеокассеталар бериларди. Топган пулимга янги видеокассетани олиб, ундаги қўшиқдан тортиб рақсларгача ўрганиб олардим. Коран Жоҳар ва Шоҳруҳ Хон ижодига меҳрим баланд эди, “Албатта, ҳинд киносида суратга тушаман”, дердим. Шунда кимдир улар билан гаплашиш учун инглиз тилини ўрганишим кераклигини айтди. Ана шу кундан бошлаб инглиз тилини ўрганишни бошладим. Ишонасизми, санъатга бўлган меҳрим сабаб, 4 йилда инглиз тилини ўрганиб, IELTS’дан 7,5 балл олдим. Тошкентда Ҳиндистондан келган сайёҳларга таржимонлик қилганимда улардан бири кино соҳасида ишлар экан. У менга “Ҳуснинг бор, қўшиқ айтиб, рақс тушоласан. Аммо ҳинд фильмларида суратга тушиш учун 18+ ролларни ҳам ижро этолишинг керак. Бўлмаса асосий ролларни ўйнолмайсан”, деганди. Бу гапдан кейин орзумдан воз кечишга қарор қилдим. Санъат учун ўзимнинг қадрим ва ота-онамнинг шаънини ерга уролмайман, — дейди актриса.
Изоҳ (0)