Италиялик машҳур кимёгар, Nutella рецепти муаллифи Франческо Ривелла 97 ёшида вафот этди. У дунёга машҳур Ферреро пастасини яратиш устида ишлагани учун “Nutella отаси” деб аталган. Бу ҳақда Мессаггеро хабар берди.
Кимёгар 1952 йилда 25 ёшида Ферреро компаниясига ишга кирган ва турли маҳсулотлар тайёрлашда қўлланиладиган хом ашёни ўрганишни бошлаган. Ўша пайтда қандолатчилик бренди атиги олти йилдан бери мавжуд бўлиб, Италиянинг шимолида жойлашган кичик Альба шаҳрида фаолият юритаётганди.
Ривелла Микеле Ферреронинг ўнг қўлига айланди: у Миланда махсус ташкил этилган лабораторияда Микеле амакиси Жованни билан бирга сотиб олган хом ашёни, шунингдек, Европанинг ярми бўйлаб рақобатчиларнинг маҳсулотларини таҳлил қилар эди, дейилади хабарда.
Франческо Ривелла техник менежер, кейинчалик фундаментал тадқиқотлар бўйича директор ва 1993 йилда нафақага чиққунга қадар Феррерода фаолият юритган. Nutellaдан ташқари, у Ферреронинг бошқа машҳур маҳсулотлари — Mon Cheri конфетлари, Tic Tac дражеси, Kinder Chocolate, Kinder Surprise ва Ferrero Rocher рецептларини ишлаб чиқишга катта ҳисса қўшган.
Бугунги кунда Ферреро гуруҳида 47 мингдан ортиқ киши ишлайди ва унинг брендлари 170 дан ортиқ мамлакатларда сотилади. Бренд ҳали ҳам Ферреронинг учинчи авлоди томонидан бошқариладиган оилавий корхона бўлиб қолмоқда.
Nutella шакар, фундук, какао ва сутни ўз ичига олган еттита таркибий қисмдан иборат. Бундан ташқари, паста таркибида палма ёғи мавжуд, шунинг учун экофаоллар кўпинча Феррерони ўрмонларни кесишда айблайди, аммо компания фақат “барқарор 100% РSPO сертификатига эга” палма ёғидан фойдаланишини таъкидлайди.
Nutella ҳақида қизиқарли фактлар
- Nutellaнинг илк версияси Иккинчи жаҳон урушидан сўнг яратилган.
- Nutella тайёрлаш учун жуда кўп миқдорда фундук керак бўлади. Бир банкада 50 га яқин ёнғоқ ишлатилади.
- Халқаро Nutella куни 2007 йилда бир блогер томонидан жорий этилган.
- 1960 йилларда Италияда Nutella’нинг машҳурлиги энг юқори чўққига чиқди. Агар бола бозорга бир бурда нон билан борса, пештахталарда ишлайдиган одамлар болага унинг устидан юпқа қилиб паста суртиб берган.
- 2017 йилда Германияда ўғрилар 20 тонна Nutella’ни ўғирлашга муваффақ бўлди ва у сақланган музлатгичли трейлерни олиб кетишди. Одамлар Nutella’ни биринчи марта ўғирлаётгани йўқ, 2013 йилда шунга ўхшаш ҳолатда беш тонна ўғирланган.
Изоҳ (0)