Мадриднинг “Реал” клуби УЕФА Чемпионлар Лигаси 1/8 финалида “Атлетико”ни пенальтилар сериясида мағлуб этиб, чорак финалга йўл олди.
Жавоб учрашувида “қироллик клуби” 0:1 ҳисобида мағлуб бўлди, бироқ умумий ҳисобда (2:2) тенглик сақланганлиги сабабли, ғолиб пенальтилар сериясида аниқланди. “Реал” унда 4:2 ҳисобида зафар қучди. Бу ғалаба орқали “қаймоқранглилар” иккита тарихий натижа қайд этди.
Squawka нашри маълумотига кўра, “Реал” Чемпионлар Лигаси тарихида пенальтилар сериясида энг кўп ғолиб бўлган клубга айланди. “Атлетико” устидан қозонилган ғалаба уларнинг мусобақа доирасидаги тўртинчи пенальтилар сериясидаги ғалабаси сифатида қайд этилди.
Бундан ташқари, журналист Педро Мартиннинг хабарига кўра, “Реал” Чемпионлар Лигаси чорак финалига 40 марта йўл олди ва бу борада ҳам мутлақ рекорд ўрнатди. Ундан кейинги ўринларда “Бавария” (34 марта) ва “Барселона” (24 марта) жойлашган.
Карло Анчелотти шогирдлари ярим финал йўлланмаси учун Лондоннинг “Арсенал” клуби билан кураш олиб боради. Ушбу баҳслар 9 ва 27 апрель кунлари бўлиб ўтади.
Изоҳ (0)