Чемпионлар Лигаси 2018/19 йилги мавсуми финали ўтказилиши керак бўлган 1 июнь кунида футбол олами Хосе Антонио Рейеснинг ўлими ҳақидаги хабардан шокка тушди. Қуйида енгилмас “Арсенал”нинг аъзоси бўлган, “Реал Мадрид”га Испания Ла Лигасидаги 30-чемпионликни қўлга киритишда ёрдам берган ва ўзи тарбия топган “Севилья” жамоаси билан уч марта Европа Лигасида ғолиб чиққан футболчининг фаолияти ҳақида сўз боради.
Бергкампнинг ўринбосари
“Арсенал” мураббийи бўлиб ишлаган Арсен Венгер кўп бора ёш истеъдод эгаларини кузатган, бироқ уларнинг барчасини ҳам жамоасига олиб келмаган. 20 ёшли испаниялик футболчининг трансфери эса имкон қадар тез ҳал қилинганди. Ўша вақтда Рейес “Севилья” билан Сегундада, Испания U-19 жамоаси билан Европа чемпионатида ғолиб чиққанди. Доим истеъдодли футболчилари учун катта пул талаб қилиб келган Андалусия клуби спорт директори Рамон Мончи 2004 йилда Хосе Антонио Рейесни 20 миллион еврога сотади.
Арсен Венгер Хосени Терри Анри билан дуэтда ўйнатмоқчи эди ва Дэннис Бергкампнинг ўринбосари сифатида кўраётганди. Нидерландиялик футболчида аэрофобия (самолётда учишдан қўрқиш) бор эканини ҳамма биларди ва мураббий муҳим ўйинлар учун “Б режаси”ни тайёрламоқчи эди. Камтар ва доим кулиб юрадиган — франциялик мутахассис кўплаб истиқболли испан футболчилари ичидан ажратиб олган ўйинчисини айнан шундай эслаб қолганди.
Англия Лига Кубогининг бешинчи босқичида Бергкампни алмаштиришга ҳожат бўлмади, бироқ “Челси”га қарши баҳсда айнан Рейес ўйинни ўзгартириб, Карло Кудичини дарвозасига иккита тўп киритди. Ўшанда англиялик мухлислар биринчи марта испаниялик футболчининг исмини қўшиқ қилиб куйлаганди. Хосе Премьер Лига мавсумида бирорта ҳам мағлубиятга учрамай чемпион бўлган жамоанинг бир қисми эди.
Фабрегас Испаниядан Англияга Рейесдан бир йил олдинроқ кўчиб ўтган бўлса-да, Франсесканинг сўзларига кўра, унинг Туманли Албиондаги биринчи яқин дўсти Хосе бўлган ва нотаниш шароитларга мослашишига ёрдам берган. Улар узоқ муддат хонадош бўлган.
Техникаси кучли, яхши тезлик ва кучли зарбага эга бўлган Рейес инглиз футболчиларининг жуда қўпол ўйнашидан азият чекарди. Гари Невилл ўз автобиографиясида испаниялик футболчи тўпни унинг оёқлари орасидан ўтказганини, кейин эса “Манчестер Юнайтед” сардори вазият туғилиши билан ундан қасос олишга ҳаракат қилганини тан олганди.
Инглиз футболчилари Рейесни қандай тўхтатиш мумкинлигини топган вақтда, “Арсенал” Чемпионлар Лигасида ажойиб мавсум ўтказди. Лондон клуби гуруҳ босқичи 3-туридан бошлаб то финалгача бирорта ҳам гол ўтказиб юбормади.
Хосе деярли барча ўйинларда майдонга тушди, лекин финал олдидан Арсен Венгер Александр Глеб вариантини танлади. “Барселона”га қарши финалнинг 18-дақиқасида Енс Леманн қизил карточка олди ва “Арсенал” бир киши кам бўлиб қолди. Лондонликлар ҳисобни очган бўлсада, ғалабани ушлаб қололмади. Рейес беш дақиқага майдонга туширилганди.
Уй соғинчи
Финалдаги мағлубиятдан кейин Рейеснинг ватанга қайтиш хоҳиши ортди. Футболчи Хулио Баптиста ўрнига “Реал”га бир мавсумга ижарага берилди. Хосе тезда оптимал формага кирди ва Фабио Капеллонинг 4-3-3 схемасида барқарорроқ ўйнашни бошлади. Янги келган футболчи Рауль ва Руд ван Нистелрой билан триода гоҳ ўнг қанот, гоҳ чап қанот ҳужумчиси вазифасини бажарди. Агар Девид Бекҳэм бош мураббийнинг талабларини бажаришга қийналса, испаниялик футбол унинг ўрнини ҳам эгалларди.
Рейес мавсум давомида жами 38 та ўйин ўтказди ва барибир қаҳрамонга айланди. Сўнгги тур олдидан Ла Лига етакчиларида 73 тадан очко бор эди. “Реал” очко йўқотадиган бўлса, охирги баҳсда аутсайдер “Химнастик”ка қарши майдонга тушадиган “Барселона” чемпионга айланиши мумкин эди. Мадрид клуби “Мальорка”ни қабул қилди. Ўйиннинг 65-дақиқасига келиб “Реал” 0:1 ҳисобида мағлуб бўлаётганди, Каталония пойтахтида “кўк-анорранглилар” рақибини 4:0 ҳисобида тор-мор келтираётганди. 66-дақиқада Фабио Капелло Девид Бекҳэм ўрнига Хосе Антонио Рейесни майдонга туширди. Икки дақиқадан сўнг испаниялик футболчи ҳисобни тенглаштирди ва 83-дақиқада деярли 30 метрдан зарба йўллаб гол урди. “Реал” ўз тарихида ўттизинчи марта Испания чемпионлигини қўлга киритди ва бунда Рейеснинг ёрдами катта бўлди. Ўшанда “қаймоқранглилар” ўзаро ўйинлар натижаларига кўра каталон клубини ортда қолдирганди.
“Реал”да чемпионлик ҳам барқарорликни таъминламади. Президент Роман Калдерон мураббий Фабио Капеллони истеъфога чиқарди. Кейин Рейес ва яна бир қанча футболчилар жамоани тарк этди. “Қироллик клуби” Хосени “Арсенал”дан сотиб олмади, футболчи эса Лондон клуби билан шартномани узайтиришдан бош тортди ва Мадридда қолди. Бу сафар “Атлетико” сафида.
Мадриднинг иккинчи томони
Хосе Рейес “Арсенал” билан Чемпионлар Лигасида ғолиб бўлишга яқин келганди, бироқ футболчи мағлубиятнинг ўрнини Европа Лигасидаги ғалабалар билан тўлдирди. Аммо Рейес “Атлетико”да дарҳол тан олинмади.
Мухлислар яқинда “Реал” логотипини ўпган футболчини “матрасчилар” сафига ўтишига қаршилик билдирди. Жамоа бош мураббий Хавьер Агирре қанотларда Макси Родригез ва Симаони ўйнатишни афзал кўраётганди. Параллел равишда Диего Форлан формасини тиклаётганди, Серхио Агуэро эса ўсаётганди. Баъзида Рейеснинг асаблари дош бермасди.
Мен каби футболчилар борини беришга ва унинг ўрнига фақатгина кўкаришлар ва шишлар орттириб олишга мажбур. Баъзи мухлислар “Реал”даги тарихимдан бошқа ҳеч нарсани кўришни хоҳламайди. Лекин футбол “томоша кўрсатмоқчи бўлган ҳамма футболчиларга қўполлик қил” тамойили билан эмас, балки “майдонга чиқиш, ўйнаш ва қойил қолдириш” мақсадида ўйналишини унутмаслик керак, — деганди Хосе.
Рейес бошқа бир испаниялик мураббий Кике Санчес Флорес шуғуллантираётган “Бенфика” жамоасига ижарага берилди. Мутахассис “Арсенал” ва “Реал”да юлдузга айланган футболчига қандай қилиб бунчалик паст баҳо бериш мумкинлигини тушунмади ва Хосега чексиз ишонч билдирди. Мавсум якунида мураббий ҳам, футболчи ҳам “Атлетико”га жўнаб кетди.
Мадрид клуби ажойиб мавсум ўтказди. “Матрасчилар” мамлакат кубогини қўлга киритди, ўз тарихида биринчи марта Европа Лигасида ғолиб чиқди ва УЕФА Суперкубогини ютди. Флорес бир вақтнинг ўзида асосий таркибда Рейес, Агуэро ва Форланга жой топа олди, дарвозани Давид Де Хеага ишониб топширди ва Диего Костани асосий таркиб футболчисига айлантирди.
Севильяга қайтиш
Кике жамоадан кетганидан кейин Рейес яна ўзини Мадридда керакциздек ҳис қилишни бошлади. Ҳатто Европа Лигасидаги навбатдаги ғалаба ҳам вазиятни яхшиламади. Вингер ватани “Севилья”га қайтди. Футболчи ҳали ҳам Ла Лига клублари футболчилари билан жисмоний жиҳатдан беллашишда қийналарди. Жамоа бош мураббийи Унаи Эмери футболчининг клубда етакчи ва ўрнак бўлиши муҳимлигини тушуниб, ўзига ишончини йўқотмаслиги учун Рейесга юкламаларни оширди.
Шундай қилиб Хосе “Бетис”га қарши биринчи Андалусия дербисида 11-сонияда ҳисобни очишга муваффақ бўлди. Рейес Европа Лигаси финалларидаги кетма-кет учта ғалабанинг иккитасида ўйинни асосий таркибда бошлаганди.
Рейес ҳақиқатан ҳам ёш жамоадошларини илҳомлантирарди. Улардан бири ҳимоячи Альберто Морено бўлганди. У ҳам Хосе каби андалусияликлар тарбияланувчиси эди ва ёшлар миқёсида Европа чемпиони бўлганди. Морено АПЛга йўл олди ва Рейес қилолмаган ишни бажарди. Футболчи “Ливерпуль” билан Чемпионлар Лигасида ғолиб чиқди. Собиқ жамоадошининг ўлимини эшитган Альберто шокка тушиб қолди, Мадриддаги Чемпионлар Лигаси финалидаги бир дақиқалик сукут вақтида кўз ёшларини зўрға ушлаб турди ва ўйиндан сўнг марҳум кумирининг портрети туширилган футболка кийди.
Тезликни ошириш
Европа Лигасида бешинчи марта ғолиб чиққанидан сўнг испаниялик футболчи оёғини синдиришларидан чарчаганини англади ва футболдаги фаолиятини якунламоқчи бўлди. Темпи пасайишда давом этаркан, аввал “Эспаньол”, сўнг “Кордоба” сафида ўйнади. Якунда фахрий футболчини Хитойнинг “Синсзян Тяншан Леопард” клуби сотиб олди. Бироқ шарқий яримшардаги ҳаёт европалик вингер учун осон кечмади, Испаниядаги уйида эса икки нафар кичкина қизалоғи Ноэлия ва Триана улғайиб борарди. Шу сабабли Рейес қишда оиласи бағрига қайтишга қарор қилди.
35 ёшли вингер баҳорги мавсумни собиқ жамоадоши Диего Капелнинг таклифига биноан “Эстремадуре” жамоасида ўтказди. Ярим профессионал клуб аввалроқ Б Сегундага чиққанди ва Рейеснинг ёрдами билан мусобақада жон сақлаб қолганди. Футболчининг шартномаси ярим йилга мўлжалланганди ва Хосе фаолиятини якунлашини эълон қилишга тайёрланаётган бўлиши мумкин эди.
Ёзнинг биринчи кунида Хосе 23 ёшли укаси билан Mercedes С550 машинасида Алмендралехо шаҳридан ўз уйига, Утрерга кетаётган эди. А-376 трассасида тезликни оширган автомобиль юк машинасига бориб урилган. Ака-уканинг иккиси ҳам ҳалок бўлган, яна бир йўловчи танасининг 60 фоизи куйиши билан касалхонага ётқизилганди.
.jpg)
Хосе Антонио Рейес билан юз берган фожиадан тўрт йил ўтиб, “Севилья” Европа Лигасида яна ғалаба қозонди. Жамоа финалда Италиянинг “Рома” жамоасини пенальтилар сериясида мағлуб этди. Бу Андалусия клубининг мусобақадаги еттинчи чемпионлиги бўлди.
Изоҳ (0)