Қирғизистон Боткендан Қўқонгача темирйўл қуришни режалаштирмоқда. Бу ҳақда Қирғизистон ҳукумати томонидан эълон қилинган 2030 йилгача мўлжалланган миллий ривожланиш дастурида қайд этилган.
Дастурда келтирилишича, Боткендан Қўқонгача темирйўл қурилиши янги иш ўринлари яратилишига, транспорт инфратузилмаси ва савдо алоқаларининг яхшиланишига хизмат қилади. Лойиҳанинг батафсил маълумотлари келтирилмаган.
Ташқи транспорт алоқаларини ўрнатиш, хусусан, Хитой—Қирғизистон—Ўзбекистон магистрали лойиҳасини амалга ошириш, транзит имкониятлари ва савдо алоқаларини кенгайтиришга ҳам алоҳида эътибор қаратилмоқда. Ушбу йўналишдаги темирйўлни қуриш ишлари 2024 йилнинг декабрида бошланганди.
Ички темир йўлларни кенгайтириш режалаштирилмоқда. Булар орасида Қирғизистон президенти Садир Жапаров 2024 йил май ойида эълон қилган Балиқчи—Қоракўл тармоғи лойиҳаси ҳам бор.
Дастурда Чотқол—Тошкент муқобил автомобиль йўлини барпо этиш ҳамда бошқа бир қатор автотрассаларни янгилаш ҳам кўзда тутилган.
Изоҳ (0)