Qirg‘iziston Botkendan Qo‘qongacha temiryo‘l qurishni rejalashtirmoqda. Bu haqda Qirg‘iziston hukumati tomonidan e’lon qilingan 2030-yilgacha mo‘ljallangan milliy rivojlanish dasturida qayd etilgan.
Dasturda keltirilishicha, Botkendan Qo‘qongacha temiryo‘l qurilishi yangi ish o‘rinlari yaratilishiga, transport infratuzilmasi va savdo aloqalarining yaxshilanishiga xizmat qiladi. Loyihaning batafsil ma’lumotlari keltirilmagan.
Tashqi transport aloqalarini o‘rnatish, xususan, Xitoy—Qirg‘iziston—O‘zbekiston magistrali loyihasini amalga oshirish, tranzit imkoniyatlari va savdo aloqalarini kengaytirishga ham alohida e’tibor qaratilmoqda. Ushbu yo‘nalishdagi temiryo‘lni qurish ishlari 2024-yilning dekabrida boshlangandi.
Ichki temir yo‘llarni kengaytirish rejalashtirilmoqda. Bular orasida Qirg‘iziston prezidenti Sadir Japarov 2024-yil may oyida e’lon qilgan Baliqchi—Qorako‘l tarmog‘i loyihasi ham bor.
Dasturda Chotqol—Toshkent muqobil avtomobil yo‘lini barpo etish hamda boshqa bir qator avtotrassalarni yangilash ham ko‘zda tutilgan.
Izoh (0)