Саудия Арабистонининг “Ал-Ҳилол” клуби икки етакчиси Ал Булайҳи ҳамда Сергей Милинкович-Савич жароҳат олиб, узоқ муддат сафдан чиқди. Бу ҳақида клуб ўзининг Х (собиқ Twitter) саҳифасида маълум қилди.
Манбада ёзилишича, Али Ал-Булайҳида сон мушаклари жароҳати кузатилган. У 4-6 ҳафта давомида даволаниш ва реабилитация дастуридан ўтади. Савич ҳам 3 ҳафтага яқин шифохонада даволанишга тўғри келади. Ҳар икки футболчи ҳам Тошкентдаги “Пахтакор”га қарши ўйинда жароҳат олиб, майдонни эрта тарк этишга мажбур бўлганди. Шу сабабли Булайҳи ва Милинкович-Савич Элит ОЧЛ 1/8 финал жавоб баҳси доирасидаги “Пахтакор” билан ўйинни ўтказиб юборишга мажбур бўлади.
Тошкентдаги беллашувни ўтказиб юборган бир қанча футболчилар — Митрович, Канселу, Ренан Лоди каби легионерлар жавоб учрашувигача сафга қайтиши кутилмоқда.
Маълумот учун, “Пахтакор” — “Ал-Ҳилол” баҳсининг илк учрашувида “шерлар” 1:0 ҳисобида ғалаба қозонган. Ўйиндаги ягона гол Фламарион томонидан киритилган эди.
Жавоб баҳси эртага, 11 март куни Риёддаги “Кингдом Арена” стадионида ўтказилади.
Изоҳ (0)