ОФК Элит Чемпионлар Лигасида қатнашаётган “Пахтакор” турнирнинг 1/8 финалига йўл олди. Клуб сўнгги турда “Ас Садд”ни мағлуб этиб, турнирдаги илк ғалабасига эришди.
Жамоанинг кейинги босқичга йўл олиши бошқа ўйинлар натижасига боғлиқ эди ва ўша баҳсларда “шерлар” учун ижобий натижалар қайд этилди. Аниқроғи, муддатидан аввал плей-офф масаласини ҳал қилиб бўлган Саудия грандлари охирги турда мағлуб бўлмади ва бу “Пахтакор”нинг 1/8 финалга чиқишини расман ҳал қилди. “Ан-Насср” “Персеполис” (0:0) билан дуранг ўйнаган бўлса, “Ал-Аҳли” эса “Ал-Гарафа”дан (4:2) устун келди.
Натижада 8 ўйинда 7 очко тўплаган “Пахтакор” кучли 8 ликдан жой олди ва Элит ОЧЛ плей-оффида ўйнайдиган илк ўзбек клубига айланди. Нимчорак финалдаги рақиб — “Ал Ҳилол” ёки “Ал Аҳли” бўлади.
Ҳозирда Ғарб минтақасида 7 йўлланма эгаси аниқ — “Ал-Аҳли”, “Ал-Ҳилол”, “Ан-Насср” (учаласи — Саудия Арабистони), “Ас-Садд”, “Ар-Райян” (иккаласи — Қатар), “Ал-Васл” (БАА) ва “Пахтакор” (Ўзбекистон).
Сўнгги 8-иштирокчи Эрон клуби бўлади. Агар 18 февраль куни Жалолиддин Машарипов ўйнайдиган “Истиқлол” “Ар-Райян”га ютқазмаса, кейинги босқичга чиқади. Агар “Истиқлол” мағлуб бўлса, Остон Ўрунов ҳаракат қиладиган “Персеполис” плей-оффда ўйнайди.
Энди Педру Морейра бошқарувидаги “шерлар” 3—4 март кунлари жадвалдаги ўрнига қараб “Ал-Аҳли” ёки “Ал-Ҳилол”га қарши Тошкентда баҳс олиб боради. Жавоб ўйини эса 10—11 март кунлари Саудия Арабистонида бўлиб ўтади.
1/8 финалдан ўтган жамоа марказлашган финал босқичи ўйинларини Саудия Арабистонида ўтказади.
Изоҳ (0)