Футбол бўйича Элит Осиё Чемпионлар Лигаси 1/8 финал учрашувлари доирасидаги “Пахтакор” — “Ал-Ҳилол” баҳси бўлиб ўтди. Тошкентдаги “Жар” стадионида кечган ўйинда “шерлар” 1:0 ҳисобида ғалаба қозонди.
Ўйиндаги ягона гол 29-дақиқада Фламарион томонидан киритилди. Риаскоснинг ажойиб узатмасидан кейин “шерлар”нинг бразилиялик футболчиси Яссин Буну дарвозасини ишғол қилди. Баҳснинг қолган дақиқалари ҳам кескин курашлар остида ўтди, лекин дарвозаларга бошқа тўп киритилмади.
Sofascore портали ўйиндан кейин футболчиларнинг майдондаги ҳаракатларини баҳолади. Унга кўра, учрашувнинг энг яхши футболчиси дея ҳимоячи Ҳожиакбар Алижонов топилди — 8.0 балл. Учрашувни тўлиқ ўтказган футболчи ўйин давомида 31 марта шерикларига пас берган ва уларнинг 20 мартаси аниқ етиб борган — 61 фоиз. Шунингдек, Алижонов ерда 8 та кураш олиб борган ҳамда унинг 6 мартасида рақибидан устун келган. Ҳожиакбар 3 марта дриблинг амалга ошрган ва 2 мартасида рақибларидан тезроқ ҳамда аниқ ҳаракат қилган.
Ўйиндаги ягона гол муаллифи Фламарион эса 7.6 балл билан баҳоланди. Унинг голига ҳаммуаллифлик қилган Риаскоснинг ўйини эса 6.9 баллга лойиқ деб топилди.
“Ал-Ҳилол” сафида эса энг яхши футболчи сифатида Каё Сезар эътироф этилди — 7.7.
Эслатиб ўтамиз мазкур жамоалар ўртасидаги жавоб баҳси 11 март куни Риёдда бўлиб ўтади.
Изоҳ (0)