“Пахтакор” — “Ал-Ҳилол” учрашувида устунлик ким томонда?

Футбол бўйича Элит Осиё Чемпионлар Лигаси 1/8 финал доирасидаги “Пахтакор” — “Ал-Ҳилол” учрашуви бугун, 4 март куни бўлиб ўтади. 

Ўзбекистон ва Саудия Арабистонининг энг совриндор клублари ўртасидаги баҳс Тошкентдаги “Жар” стадионида ўтказилади. Учрашув 21:00 да старт олади. 

Ўзаро ўйинлардаги натижа

Шу кунга қадар мазкур жамоалар ўзаро 8 марта тўқнаш келган бўлиб, 5 та учрашувда риёдликлар ғалаба қозонган бўлса, 3 ўйин дуранг билан якунланган. “Пахтакор” ҳозиргача умуман “Ал-Ҳилол”ни мағлуб эта олмаган.

Ўзаро ўйинларда киритилган тўплар фарқи ҳам Саудия клуби фойдасига — 15:5. “Шерлар” сафидан Игор Сергеев 2 марта “Ал-Ҳилол” дарвозасини ишғол қилган, шунингдек, Зайниддин Тожиев, Даврон Ҳошимов ва Эрен Дердиёк биттадан гол киритишни уддалаган.

Қизиқарли фактлар

Чемпионлар Лигасидаги иштирок бўйича икки жамоада ҳам бир хил натижа қайд этилган — 19 мартадан. Ҳар икки жамоанинг ҳам мураббийлари португалиялик ҳисобланади. “Пахтакор”ни ҳозирда Педру Морейра бошқармоқда. “Ал Ҳилол”га эса Жорже Жезуш устозлик қилади.

Совринлар

“Шерлар” Ўзбекистоннинг энг совриндор жамоаси ҳисобланади. Улар 15 марта Суперлига олтин медалларига эга чиққан ҳамда 13 марта Ўзбекистон Кубогида ғалаба қозонган. Клуб ички чемпионатнинг барча мавсумларда қатнашиб келаётган уч клубдан бири бўлиб турибди. 
Риёдликлар ҳам Саудия Арабистонининг энг совриндор жамоаси ҳисобланади. Улар ички чемпионатида 19 бор, мамлакат кубокларида 37 марта, Чемпионлар Лигасида эса 4 бор зафар қучган.

Таркиб ва йўқотишлар

“Пахтакор” қишки трансферлар мавсумида бир қанча харидларни амалга оширди. Клуб Башар Ресан, Игор Сергеев, Лукка, Жонатан, Фламарион, Риаскос Брайан каби футболчиларни ўз сафига қўшиб олган. 
“Ал-Ҳилол” таркибида эса Яссин Боно, Калиду Кулибали, Милинкович-Савич, Канселу, Малком ва Митрович каби бир қанча юлдузлар ҳаракат қилади.

“Ал-Ҳилол” Тошкентга жиддий йўқотишлар билан келди. Клубнинг Александир Митрович, Ренан Лоди, Жоао Канселу ва Ёссир ал Шаҳрони каби етакчилари бугунги баҳсни ўтказиб юборади. “Пахтакор”да эса фақатгина Сардор Собирхўжаев дисквалификация сабаб учрашувда қатнаша олмайди.

Эслатиб ўтамиз, учрашув бугун, 4 март куни Тошкентдаги “Жар” стадионида бўлиб ўтади. Беллашув 21:00 да бошланади.