Ўзбекистонда айрим компаниялар мажбурий тартибда электрон тўлов тизимларига уланади, деб хабар бермоқда Стратегик ислоҳотлар агентлиги.
Унда айтилишича, Стратегик ислоҳотлар агентлиги Иқтисодиёт ва молия вазирлиги билан ҳамкорликда электрон тўлов тизимлари хизматларидан фойдаланишни кенгайтиришга доир таклифлар ишлаб чиқилди. Жорий йилнинг 26 февраль куни Вазирлар Маҳкамаси томонидан “Электрон тўлов тизимлари хизматларидан фойдаланишни кенгайтиришга доир қўшимча чора-тадбирлар тўғрисида”ги қарор қабул қилинди.
Мазкур қарорга мувофиқ, 2025 йил 1 июлдан бошлаб аҳоли учун хизмат кўрсатувчи бюджет ташкилотлари, газ ва нефть маҳсулотларини реализация қилувчи ҳамда мулкни ижарага берувчи юридик шахслар мажбурий тартибда электрон тўлов тизимларига уланади ва тўловларни улар орқали амалга ошириш имкониятини яратади.
Электрон тўлов тизимлари орқали тўловларни қабул қилишдан бош тортиш солиқ қонунчилигига мувофиқ жавобгарликка сабаб бўлади.
Шунингдек, Стратегик ислоҳотлар агентлиги Ҳукуматнинг иқтисодий блоки ва Марказий банк билан ҳамкорликда 2025–2030 йилларда электрон тўловлар улушини ошириш бўйича Комплекс чора-тадбирлар режасини ишлаб чиқади ва эълон қилади.
Мақсад ўтган йилнинг 20 ноябрь куни президент томонидан Олий Мажлис Қонунчилик палатаси йиғилишида эълон қилинган стратегик вазифа – онлайн тўловлар улушини 60 фоизга етказиш бўйича аниқ чора-тадбирларни белгилашдан иборат экани айтилди.
Қайд этилишича, мазкур қарорнинг қабул қилиниши мамлакат тўлов инфратузилмасини модернизация қилиш, молиявий операцияларнинг шаффофлигини ошириш ва аҳоли ҳамда бизнес учун қулай шарт-шароит яратиш йўлидаги муҳим қадам ҳисобланади.
Изоҳ (0)