Ўзбекистонда тадқиқотларни қўллаб-қувватлаш жамғармаси ташкил этилади, деб хабар бермоқда Адлия вазирлиги.
Унга кўра, “Таҳлилий ва тадқиқотчилик фаолиятини ташкил қилиш бўйича қўшимча чора-тадбирлар тўғрисида”ги президент қарори қабул қилинди. Қарор билан Таҳлилий ва тадқиқот тузилмалари фаолиятини ташкил қилиш бўйича мувофиқлаштирувчи кенгаш ҳузурида Тадқиқотларни қўллаб-қувватлаш жамғармаси ташкил этилиши белгиланди.
Жамғарма маблағлари Тикланиш ва тараққиёт жамғармасида алоҳида очилган ҳисобрақамларда жамланади ва Мувофиқлаштирувчи кенгаш томонидан белгиланган тартибда сарфланади. Жамғарма маблағлари қуйидагиларга йўналтирилади, жумладан:
- мувофиқлаштирувчи кенгашнинг фаолият йўналишлари бўйича тадқиқотларни амалга ошириш;
- таҳлилий материалларни тайёрлаш ва тадқиқотларни ўтказиш учун грантлар ажратиш;
- ижтимоий сўровлар ва жамоатчилик фикрини ўрганиш бўйича тадқиқотларни амалга ошириш.
Дарвоқе, жамғарма маблағлари мақсадли ва самарали сарфланиши устидан назорат Мувофиқлаштирувчи кенгаш томонидан амалга оширилади. Мувофиқлаштирувчи кенгашга қуйидагиларга рухсат берилади:
- Жамғарма маблағларини миллий ва хорижий валюталарда банк депозитларига жойлаштириш;
- грантлар ва беғараз техник кўмак воситаларини жалб қилиш;
- жисмоний ва юридик шахсларга тўлов асосида тадқиқотлар натижалари ва маълумотлар базаларидан фойдаланиш ҳамда тадбирларда иштирок этиш имкониятларини бериш.
Янги ташкил этилган жамғармалар
Бундан аввал Ўзбекистонда Яшил хайрия жамғармаси ташкил этилиши ҳақида хабар берилганди. Бунда “Яшил олам” электрон платформаси орқали амалга оширилган хайрия тўловлари Яшил хайрия жамғармасининг алоҳида ҳисобварағига йўналтирилади.
Шунингдек, Ўзбекистон миллий инвестиция жамғармаси ташкил этилиши ҳам айтилганди. Жамғарманинг 2030 йилгача инвестиция активлари соф фойдасининг камида 50 фоизи тегишли йил якунларига кўра дивидендлар тўлашга йўналтирилади.
Шу билан биргаликда, Ўзбекистон маҳаллалари уюшмаси ҳузурида Маҳаллалар фаолиятини рағбатлантириш жамғармаси ташкил этилиши хабар қилинган.
Изоҳ (0)