“Трамп Европага нисбатан ҳақли сиёсат олиб боряпти” — Лукашенко

Беларусь президенти Александр Лукашенко Америка Қўшма Штатлари етакчиси Дональд Трамп Европага нисбатан ҳақли тарзда қаттиқ сиёсат олиб бормоқда, деган фикрда. Лукашенко бу ҳақда Тimе журналига берган интервьюсида айтиб ўтган.

Лукашенконинг баёноти Украина донини экспорт қилиш масаласи муҳокама бўлиб турганда янгради.

“Трамп ҳақ, у Европани боплаяпти. Трамп — бульдозер. У донни Польшада юклашни ёки Германияда портларда жойлаштиришни хоҳлайди. Чунки Одесса бетонланган. У ерда миналар сузиб юрибди. У донни Польша орқали ўтказиб, Гданскда ёки ўша жойдаги портда юкламоқчи бўлган эди. Рухсат беришдими? Йўқ – улар Европа бозорига дон кириб келишидан қўрқишади”, деган Лукашенко.

 

Шу муносабат билан Беларусь президенти дон масаласи бўйича Минскка назорат функциясини беришни таклиф қилди: “Келинглар, биз назорат қиламиз, Африкага юкланадиган Украина донининг бир томчиси ҳам Европага тушмайди. Лекин сасиганлар буни хоҳламайди. Трамп ҳақ, у Европани эгяпти. Фақат бу спектакл бўлмасин”, деган Беларуснинг узоқ йиллик раҳбари.

Беларусь президентининг урғулашича, Россия урушда мағлуб бўлмайди. Шунингдек, у Россиянинг энг катта ядро арсеналига эга эканлигини эслатиб ўтган.

“Россия мағлуб бўлмайди. Мағлубият ҳаммамизга жуда қимматга тушади. Аввало сизларга. Жумладан, океан ортидаги одамларга ҳам қимматга тушади. Россия энг катта ядро қуроллари арсеналига эга. Мағлубият бўлмайди. Бўлмайди. Аммо Украина мағлуб бўлиши мумкин. Бунга йўл қўймаслик керак. Келинг, ҳозироқ келишиб олайлик”, дея хитоб қилган Александр Лукашенко.