Жаҳон соғлиқни сақлаш ташкилоти (ЖССТ)нинг Россиядаги офиси раҳбари Ботир Бердиқиличевнинг айтишича, ҳозирда 1 миллиарддан ортиқ ёшлар мусиқани соғлиққа зарарли ҳолатда тинглаш одатлари сабаб эшитиш қобилиятини йўқотиш хавфи остида қолмоқда.
1 миллиарддан ортиқ ёшлар нотўғри тинглаш одатлари сабаб эшитиш қобилиятини йўқотиш хавфига дуч келаётгани ачинарли. Бироқ тўғри хатти-ҳаракатлар билан бунинг олдини олиш мумкин, дейди мутахассис.
Унинг сўзларига кўра, 2050 йилга келиб, тахминан, 2,5 миллиард ёшлар эшитиш муаммоларига дуч келади ва камида 700 миллион киши эшитиш қобилиятини йўқотгани боис реабилитацияга муҳтож бўлади.
Ҳаддан ташқари баланд товушлар эшитиш қобилиятига салбий таъсир кўрсатувчи омиллардан бири ҳисобланади, улар ҳужайраларнинг шикастланишига олиб келиши мумкин. Бироқ ўз вақтида зарур чоралар кўриб, эшитиш қобилиятини йўқотиш ҳолатларининг 60 фоиздан ортиғининг олдини олиш мумкин. Энг самарали профилактика чораси эса товушлар баландлигини соғлиққа хавфсиз меъёрларда тинглашдир.
Мусиқани хавфсиз тинглаш бўйича махсус меъёрлар мавжуд, аммо кўплаб ёшлар уларга риоя қилмайди. Бу эса эшитиш қобилиятининг йўқолиши хавфини оширади. Ҳозирда дунё аҳолисининг тахминан 5 фоизи эшитиш қобилиятини йўқотган.
Изоҳ (0)