Жаҳон соғлиқни сақлаш ташкилотининг (ЖССТ) амалдаги раҳбари Тедрос Адханом Гебрейесус кейинги беш йиллик муддатга қайта сайланди, деб хабар бермоқда Reuters.
Овоз бериш шу кунларда Женевада ўтказилаётган Жаҳон соғлиқни сақлаш ассамблеяси доирасида бўлиб ўтган. Сайлов жараёни 2021 йилнинг апрель ойида, ЖССТга аъзо давлатларнинг ташкилот бош директори лавозимига номзод таклиф қилиши билан бошланган эди. Январдаги йиғилишда ЖССТ ижроия кенгаши бу лавозимга ягона даъвогар бўлган Тедрос Адханом Гебрейесуснинг номзодини илгари сурди.
Қайта сайлангач ассамблеяга мурожаат қилар экан, Гебрейесус ЖССТ фавқулодда вазиятларга тайёргарлик кўриш ва ташкилий такомиллаштиришга эътибор қаратишини айтди. ЖССТ Бош директори пандемия даврида «ҳар тарафдан» танқид эшитиш осон бўлмаганини тан олди, лекин у ва унинг ҳамкасблари буни конструктив қабул қилиб, ишлашда давом этганини таъкидлади.
Гебрейесуснинг янги ваколат муддати 16 августдан бошланади. Қоидаларга кўра, ЖССТ Бош директори фақат бир марта қайта сайланиши мумкин.
Аввалроқ ЖССТ бош директори кўплаб мамлакатларда коронавирусга қарши чекловлар олиб ташлангани пандемия тугаганини англатмаслигини эслатганди.
Изоҳ (0)