Москва вилоятининг Фрязино шаҳрида Платан илмий-тадқиқот институти жойлашган бинода ёнғин содир бўлди.
Россия ФВВ хабар беришича, ёнғин тўрт қаватни қамраб олган – департаментнинг дастлабки маълумотларига кўра, 9 киши бинолар ичида қолган. Москва вилояти губернатори Андрей Воробёвнинг ёзишича, ёнғинда икки киши ҳалок бўлган. “112” Telegram каналининг хабарига кўра, уларнинг ҳар иккиси ҳам саккиз қаватли уйнинг юқори қаватидан сакраган. Маsh каналининг хабар беришича, яна етти киши ис газидан бўғилган ёки ёнғин ичида қолган.
Ижтимоий тармоқларда эълон қилинган сурат ва видеоларда бинодан қора тутун чиқаётгани, синган деразалардан суяниб турган одамлар ёрдам сўраётгани, қўл силкитгани акс этган. ФВВ қутқарувчилари бир кишини эвакуация қилишга муваффақ бўлган.
“ТАСС” агентлиги тезкор хизматларга таяниб, ёнаётган бинода портлаш содир бўлганини хабар қилган.
Москва яқинидаги Фрязин шаҳрида ёнаётган бинода портлаш сабаби газ баллони бўлган, — дея аниқлик киритган агентлик суҳбатдоши.
Воқеа жойида 100 дан ортиқ мутахассис ва 40 та техника ишламоқда, ёнғинни ўчиришга Москва авиация марказининг иккита Ка-32 вертолёти жалб қилинган. Ёнғинга учинчи мураккаблик даражаси берилган. Ёнғин майдони 4500 квадрат метрга етган. “База” Telegram каналига кўра, тутундан нафас олиш оқибатида камида бир киши жароҳатланган, бироқ қурбонларнинг аниқ сони номаълум.
Бинода металлга ишлов бериш цехлари, турли конвеерлар, пайвандлаш, мебел ишлаб чиқариш цехлари бўлган. Комплексда саноат кир ювиш машинаси ва бошқалар жойлашган. Ёнғинга, дастлабки маълумотларга кўра, хавфсизлик қоидаларининг бузилиши сабаб бўлган. Завод ишчилари жиҳозларни ўчиришни унутиб, ишларини тарк этган бўлиши мумкинлиги айтилмоқда.
Изоҳ (0)