Самарқанд ва Тошкент ўртасида қўшимча поездлар қатнови йўлга қўйилади

“Ўзтемирйўлйўловчи” Самарқанд—Тошкент—Самарқанд йўналишида қўшимча йўловчи поездлар ҳаракати йўлга қўйилишини эълон қилди.

Маълум қилинишича, 26—30 август кунлари Самарқандда “Шарқ тароналари XIII халқаро мусиқа фестивали” ўтказилиши ва Мустақиллик байрами муносабати билан йўловчиларга қулайлик яратиш мақсадида 25 августдан 3 сентябргача 775/776-сонли Самарқанд—Тошкент—Самарқанд йўналишида “Афросиёб” электропоездининг қўшимча қатнови йўлга қўйилди.

Поезд қуйидаги жадвал асосида ҳаракатланади:

• 775-сонли Самарқанд—Тошкент йўналиши: Самарқанд 11:11 — Тошкент 13:26
• 776-сонли Тошкент—Самарқанд йўналиши: Тошкент 13:51 — Самарқанд 16:05

Чипталарни темирйўл чиптахоналаридан ташқари электрон тарзда eticket.railway.uz орқали харид қилиш мумкин.

Эсалтиб ўтамиз, ўзбекистонликлар Мустақиллик байрами муносабати билан кетма-кет 4 кун дам олади. 3 сентябрь, сешанба иш ҳафтасининг туридан қатъи назар, барча ходимлар учун қўшимча дам олиш куни этиб белгиланган. 1 сентябрь — Ўзбекистон мустақиллиги куни 2024 йилда якшанба — дам олиш кунларига тўғри келиши муносабати билан ушбу дам олиш куни 2 сентябрь, душанба кунига кўчирилади. 31 август, шанба — ҳафтасига 6 кун ишлайдиганлар учун қўшимча дам олиш куни, 5 кунликлар учун одатий дам олиш куни бўлади.