Рамзан Қодировнинг 15 ёшли ўғли Адам Қодиров хавфсизлик хизматида “муҳим лавозим”га тайинланди. Бу ҳақда Чеченистон миллий сиёсат, ташқи алоқалар, матбуот ва ахборот вазири Аҳмад Дудаев маълум қилди.
“Қадрдон укам Адам Қодировни Чеченистон Республикаси раҳбарининг хавфсизлик хизматида муҳим лавозимга тайинлангани билан чин қалбимдан табриклайман”, — деб ёзган Дудаев Telegram’даги саҳифасида.
Унинг таъкидлашича, Адам Қодиров ўзини “ватаннинг жасур, қўрқмас ватанпарвари ва ўз динини ҳимоя қилишга тайёр шахс” сифатида кўрсатди. Шунингдек, бир неча бор Махсус ҳарбий операция зонасида бўлди.
Аҳмад Дудаев масъулиятли лавозимга тайинлангани билан Адам Қодировни яна бир бор табриклаб, унга билдирилган ишончни шубҳасиз оқлашини айтди.
Рамзан Қодировнинг 15 ёшли ўғли хавфсизлик хизматида масъулиятли лавозимга тайинлангани ҳақида Чеченистон парламенти раҳбари Магомед Даудов ҳам ёзди. Аммо у ҳам айнан қандай лавозимга тайинланганига аниқлик киритмаган.
Ички ишлар вазирлигининг Аҳмат Қодиров номидаги Чеченистон бўйича махсус полки командири Замид Чалаев ўзининг Instagram’даги саҳифасида бунга ойдинлик киритиб, Қодировнинг 15 ёшли ўғли Чеченистон раҳбарининг хавфсизлик бошқармаси бошлиғи лавозимига тайинланганини маълум қилди.
Изоҳ (0)