“Вагнер” раҳбари Евгений Пригожин Тверь вилоятида Embraer Legacy 600 бизнес-жети ҳалокатга учрашидан олдин Марказий Африка Республикаси президенти Фостен-Арканж Туадера билан учрашган. Бу ҳақда Тhе Wаll Street Journal хабар берди.
Хабарга кўра, Пригожиннинг шахсий самолёти 18 август куни МАР пойтахти Бангига қўнган. Туадера билан президентлик саройида бўлиб ўтган учрашувда Пригожин Россияда июнь ойида амалга оширилган исёнга уриниш республикадаги “Вагнер” фаолиятига халақит бермаслигини айтган.
“Вагнер” раҳбари маҳаллий ҳукумат хавфсизлигини таъминлаш ва “қишлоқ хўжалигига янги сармояларни жалб қилиш” учун МАРда “Вагнер”нинг мавжудлигини кучайтиришга ваъда берган.
Учрашувда МАР разведка бошлиғи Анри Ванцет-Лингиссара ҳам иштирок этган. Халқаро хавфсизлик бўйича офицерлар ҳамдўстлиги вакили “Пригожиннинг Бангида бўлган-бўлмагани ҳақида аниқ маълумотга эга эмаслигини” айтган.
Эртаси куни Пригожин Суданнинг Тезкор ҳаракат кучлари вакиллари билан учрашган. Делегация Бангига Пригожин учун “совға” билан етиб келган.
“Вагнер” Суданнинг Тезкор ҳаракат кучларига мамлакат армиясига қарши бир қатор ғалабаларни қўлга киритишга ёрдам берган. Улардан бири ҳарбий корхоналардан бири ва Хартумдаги базани эгаллаб олишдир. Бунга жавобан, Судан Тезкор ҳаракат кучлари вакиллари Пригожинга олтин бергани айтилмоқда.
Financial Times маълумотларига кўра, 2023 йил февраль ҳолатига кўра, МАРда 1500 га яқин “вагнерчи”лар бор. “Вагнер” 2018 йилдан бери у ерда фаолият олиб боради.
Россия ТИВ раҳбари Сергей Лавровнинг айтишича, Африка давлатлари расмийлари Европа ҳарбий контингентларининг қисқариши муносабати билан терроризмга қарши курашда ёрдам сўраб “Вагнер”га мурожаат қилган.
Судан ҳукумати аввалроқ мамлакатда“Вагнер” борлигини рад этганди.
“Икки йил давомида Суданда бирорта ҳам ‘Вагнер’ жангчиси бўлмаган. Бугунги кунда ҳеч ким йўқ. Ўйлайманки, бу сиз билишингиз керак бўлган асосий нарса”, — деган эди Пригожин.
Пригожин самолётининг ҳалокати ва Путиннинг ҳамдардлиги
23 август куни кечқурун Тверь вилоятида бизнес-жет ҳалокатга учради, ОАВ хабарларига кўра, у Евгений Пригожинга тегишли бўлган. Ҳалокатда бортдаги барча 10 киши ҳалок бўлган. Федерал ҳаво транспорти агентлиги маълумотларига кўра, йўловчилар рўйхатида “Вагнер” асосчисининг исми ҳам бор.
Пригожиннинг ўлими расман тасдиқланмаган. Бироқ Россия президенти Владимир Путин, шунингдек, бошқа россиялик сиёсатчилар (хусусан, Чеченистон раҳбари Рамзан Қодиров) унинг ўлими муносабати билан ҳамдардлик билдирди.
The New York Times, Тhе Wаll Street Journal ва бошқа нуфузли нашрлар АҚШ ва Европа расмийларининг авиаҳалокат борасидаги фикрларини чоп этди. АҚШ расмийларининг дастлабки баҳосига кўра, Пригожин ўтирган бизнес-жет бортида бомба портлаган ёки ҳалокатга бошқа турдаги саботаж сабаб бўлган. Ғарб расмийлари анонимлик шарти билан NYT’га айтишича, улар Пригожиннинг самолётини йўқ қилишга “Владимир Путин буйруқ берган”, деб ҳисоблайди.
Изоҳ (0)