8 декабрь — Конституция куни муносабати билан бугун тантанали тадбир ташкил этилди. Унда президент матбуот котиби Шерзод Асадов Шавкат Мирзиёевнинг халққа йўллаган байрам табригини ўқиб эшиттирди.
Фото: “Дарё” / Мадина Нурман
Давлат раҳбарининг қутловида бутун халққа самимий тилаклар изҳор этилиб, мазкур айём сиёсий-ҳуқуқий, ижтимоий-иқтисодий, маънавий-маърифий ҳаётимизда катта ўзгаришлар амалга оширилаётган тарихий бир шароитда ўтаётгани таъкидланган.
Ушбу муҳим ўзгаришлар алоҳида қайд этилиб, ислоҳотларни жадал давом эттириш, янгиланган Конституция нормаларини ҳаётга татбиқ этиш бундан буён ҳам эътибор марказида бўлиши айтилган.
“Халқимизнинг ҳуқуқий тафаккури, хоҳиш-иродасининг ёрқин тимсоли ва амалий ифодаси бўлган Асосий Қонунимиз билан ҳар қанча фахрлансак арзийди. Бу ноёб қомуснинг ҳар бир моддаси ва қоидасини ўрганиш, уларга ҳурмат, меҳр ва эътибор билан муносабатда бўлиб, тўлақонли ижро этиш барчамиз учун муқаддас бурч ва мезонга айланишини истардим”,- дейилади президент табригида.
Байрам тадбирида Олий Мажлис аъзолари, Президент администрацияси, давлат ташкилотлари ва жамоатчилик вакиллари иштирок этди.
Изоҳ (0)