“Чуқур ўйланган ва узоқни кўзлаган танлов” — президент Ўзбекистон ЖСТга аъзо бўлиши ҳақида гапирди

Ўзбекистоннинг Жаҳон савдо ташкилотига аъзо бўлиши чуқур ўйланган ва узоқни кўзлаган танлов. Бу ҳақда Шавкат Мирзиёев Нукусда тадбиркорлар билан очиқ мулоқотда айтиб ўтди.

“Ушбу ташкилотга кириш – чуқур ўйланган ва узоқни кўзлаган танлов, қолаверса, ислоҳотларимизнинг ажралмас бир қисми. Лекин айримлар бунга шубҳа билан қараяпти, бошқалар ‘корхоналар синади’ импорт босиб кетади” деган хавотир билан юрибди”, дея унинг сўзларини келтирди матбуот котиби Шерзод Асадов.

Маълум қилинишича, Жаҳон савдо ташкилотига 2026 йилда аъзо бўлиш бўйича катта қадамлар қўйилмоқда.

“Бир нарсани тушуниш зарур, импорт божлари ишлайди. Шунинг учун, ташкилот аъзолари билан музокаралар ўтказяпмиз.

Эртанги кунимиз — бу тенг рақобат муҳити ва экспортга қаратилган саноат ва савдо сиёсати. Иқтисодиётимизга олдинлари протекция қайсидир маънода керак эди. Яна шу йўлда давом этсак, имкониятларимиз чекланиб қолади. Чунки, халқаро ишлаб чиқариш занжирларига кирмасак, иқтисодий ўсиш биз кутгандек бўлмайди”, деди давлат раҳбари.

Президент Жаҳон савдо ташкилотига аъзолик халқаро транзит юк ташишда ортиқча тўлов ёки чекловлардан халос қилишини, бу рақобатдош бўлишга яна бир туртки беришини айтиб ўтди. 

Умуман, маҳсулот ва хизматлар сифатини ошириш, ташқи бозорларда муносиб ўрин топиш учун халқаро стандартларга ўтиш кераклиги таъкидланди.